iPhone Xs таннархи ошкор қилинди

Фото: Shannon Stapleton / Reuters

TechInsights мутахассислари iPhone Xs компонентлари нархини ҳисоблаб, смартфон таннархини маълум қилишди.

Маълум қилинишича, 256 Гбайт хотирага эга iPhone Xs Max қисмлари умумий нархи 443 долларни, яъни 64 Гбли с iPhone X’дан 48 доллар қимматроқ туради. Смартфоннинг бозордаги нархи эса 1100 долларни ташкил қилади. Смартфоннинг энг қиммат қисми 6,5 дюймли OLED-дисплейи бўлиб, у 80,5 доллар туради. Apple A12 Bionic процессори нархи 72 долларни ташкил қилади.

Сўнгра нарх бўйича тезкор хотира (64,5 доллар), корпус (58 доллар) ва камералар (44 доллар) келади. Смартфоннинг энг арзон қисми аккумулятори бўлиб, 9 доллар турар экан. Тадқиқотда қурилмани ишлаб чиқиш, дастурий таъминотини яратиш, логистика ва маркетингга кетган харажатлар ҳисобга олинмаган.

Apple 12 сентябрда янги iPhone Xs, Xs Max ва Xr смартфонларини тақдим қилди.

#Apple #iPhone Xs #таннарх