Украина Ўзбекистондан енгил автомобиллар импортига нисбатан текширув бошлади

Украинада Ўзбекистондан енгил автомобиллар импортига нисбатан антисубсидия текшируви ўтказилади. Бу ҳақда Украина Халқаро савдо бўйича идоралараро комиссияси маълум қилган.

Суриштирув «Укравтопром» Украина автомобиль ишлаб чиқарувчилар уюшмасининг шикояти асосида бошланди.

Комиссиянинг аниқлашича, шикоятда Ўзбекистон енгил автомобиль ишлаб чиқарувчилари Ўзбекистон ҳукуматидан субсидиялар олган бўлиши ва бундай субсидиялардан алоҳида имтиёзлардан фойдаланган бўлиши мумкинлигини кўрсатадиган етарли маълумот келтирилган.

Шунингдек, Ўзбекистондан Украинага енгил автомобиллар импорти Украина ишлаб чиқарувчиларига сезиларли зарар етказиши мумкин бўлган ҳажмлар ва шароитларда амалга оширилаётгани ҳақидаги маълумотлар мавжудлиги ҳам айтилган.

Тадқиқот даври мобайнида (2015-2017 йиллар) Ўзбекистондан енгил автомобиллар импорти ҳажмининг сезиларли даражада ўсиши қайд этилди: мутлақ кўрсаткичларда - 760,7%, Украинада истеъмол ва ишлаб чиқаришга нисбатан - мос равишда 440,7% ва 957,7%.

Шу билан бирга, енгил автомобиллар импорти нархи Украинада ишлаб чиқарилган енгил автомобиллар нархига қараганда паст бўлган.

Кўрсатилган ҳолатлар ва Қонуннинг 15-моддаси ўн учинчи қисмига биноан Комиссия қарор қабул қилди, унга кўра Ўзбекистондан Украинага енгил автомобиллар импортига нисбатан субсидияларга қарши текширув бошланди.