Молдова президенти бешинчи марта лавозимидан четлатилади

Молдова президенти Игорь Додон ўз лавозимидан бешинчи марта четлатилади. Бу ҳақда мамлакат парламенти раиси Андриан Канду маълум қилди.  
 
Кандунинг айтишича, бунга Додон томонидан парламент қабул қилган икки қонун лойиҳасини имзолашдан бош тортиши сабаб бўлган. Додон республика майдони жойлашган ернинг АҚШ элчихонасига берилиши ҳамда Европа кунини 9 майда Ғалаба куни билан бир кунда нишонлаш лойиҳаларини имзолашдан бош тортган.

Парламент раисининг фикрича, Додон телевидение ва радио ҳақидаги янги кодексни ҳам рад этмоқчи ва шу сабабли ҳукмрон коалиция унинг лавозимидан четлатилишини ва ваколатларининг бош вазир Павел Филипга берилишини талаб қилади.

“Бу юз бермаслиги керак. Ҳар бирмиз, ёқадими-йўқми, конституцияда белгиланган ўз мажбуриятларимизни бажаришимиз керак”, деб айтган Канду. 

Маълум қилинишича, президент ва бош вазир ўртасидаги келишмовчиликлар сабабли мамлакатдаги парламент сайловларидан кейин конституциявий ислоҳот ўтказилиб, давлат бошқаруви парламент шаклига ўтказилади. 

Аввалроқ Додон Канду тайинлаган икки янги вазирни тасдиқлашдан бош тортгани учун лавозимидан четлатилган.