Италияда юзлаб Maserati’лар ёниб кул бўлди

Фото: genova.repubblica.it

Италиянинг Савона шаҳри портида ёмон об-ҳаво сабабли ёнғин чиқди. Ёнғин оқибатида портдаги бир неча юзлаб янги машиналар, асосан Maserati автомобиллари ёниб кул бўлган, деб хабар берди La Repubblica нашри.

Таъкидланишича, ёмон об-ҳаво сабабли денгиз суви портни, жумладан Яқин Шарққа экспорт қилиниши керак бўлган автомобиллар турган терминални тошқин остида қолдирган. Сув автомобилларда қисқа туташув юз беришига олиб келган, бу эса аккумулятор батареяларининг портлаши ва кучли ёнғин чиқишига сабаб бўлган. Ёнғинни ўчиришга бир неча соат талаб қилинган.

Енгил автомобиллардан ташқари, юк машиналар ва бошқа транспорт воситалари ёниб кетган. Маҳаллий аҳолининг таъкидлашича, ёнғинда 300 дан кўпроқ автомобилга шикаст етган.