Андрей Аршавин фаолиятини якунлади

Россиялик таниқли футболчи, Қозоғистоннинг “Қайрат” клубида тўп сураётган Андрей Аршавин футболчилик фаолиятини якунлаганини маълум қилди.

37 ёшли Аршавин 11 ноябрда “Қайрат” учун хайрлашув учрашувини ўтказди. Декабрда футболчининг клуб билан амалдаги келишуви тугайди. Аввалроқ томонлар шартномани узайтирмасликларини эълон қилишган. Аршавин Қозоғистон жамоасидан кетгандан кейин ўйнашни давом эттириши ҳақидаги саволга “Ўйлашимча, фаолиятимни тўлиқ якунламоқдаман”, деб жавоб қилган.

Футболчи унга Қозоғистонда тўп суриш ёққанини айтган. “Қозоғистондан ўзим билан нафақат Олмаотадаги, балки бутун Қозоғистондаги одамларнинг илиқ муносабатлари, қўллаб-қувватловини олиб кетмоқдаман. Одамлар менинг ўйинимни кўргани келишганини биламан. Жамоа билан яхши муносабатлар ўрнатилган, кейин ҳам ўзаро мулоқот қилиб турамиз”, деб айтган футболчи.

Аршавин узоқ йиллар Санкт-Петербургнинг “Зенит” жамоасида тўп сурган. У жамоада 1999-2009, 2013-2015 йиллар ўйнаган. У “Зенит” таркибида 352 та ўйинда майдонга тушиб, 74 та голга муаллифлик қилган, жамоадошларига 99 та голли узатма оширган. Аршавин “Зенит” таркибида Россиянинг 3 карра чемпиони бўлган, УЕФА кубоги ва суперкубогини қўлга киритган. 2006 йилда “Футбол” нашри талқинига кўра Россиянинг энг яхши ўйинчиси деб топилган.

Футболчи 2009 йил январида Лондоннинг “Арсенал”ига ўтган. У “Арсенал”да 2009-2013 йиллар тўп сурган, 145 та ўйин ўтказиб, 31 та голга муаллифлик қилган. 

Аршавин “Арсенал”дан кейин “Кубан”да, сўнгра “Қайрат”да тўп сурган. У қозоқ клуби таркибида Қозоғистон чемпионатининг 3 карра кумуш медал, мамлакат кубоги ва суперкубоги соҳиби бўлган.

Футболчи Россия терма жамоаси учун 2002-2012 йиллар тўп сурган. У терма жамоада ҳаммаси бўлиб 75 та ўйин ўтказиб, 17 голга муаллифлик қилган. 2008 йилда терма жамоа сафида Европа чемпионатининг бронза медалини қўлга киритган.