Россия президентининг матбуот котиби Дмитрий Песков Сингапур хавфсизлик хизматлари Владимир Путиндан металлқидиргич рамкасидан ўтишни сўрагани ҳақидаги маълумотни рад этди. Бу ҳақда 15 ноябрь, пайшанба куни «Говорит Москва» радиостанцияси ўз Telegram-каналида хабар берди.
«У худди ҳамма каби турникет орқали ўтди», - деди Кремль вакили.
Аввалроқ, Кремлга яқин журналист Дмитрий Смирнов пайшанба куни Путин Россия - АСЕАН саммити вақтида металлқидиргич рамкасидан ўтмагани, «Коммерсантъ» газетаси махсус мухбири Андрей Колесниковнинг бу борадаги хабари асоссиз эканини хабар берди.
Андрей Колесников Сингапурда Россия - АСЕАН саммити олдидан Россия президенти Владимир Путинни ўрнатилган тартиб-қоидага зид равишда металлқидиргич рамкасидан ўтишга мажбур қилишгани ҳақида хабар тарқатганди.
Мухбирнинг айтишича, саммит ўтган Suntec савдо-кўргазма марказида Путин ҳар доимгидек металлқидиргич рамкаси ёнидан ўтиб кетмоқчи бўлганда, унга рамка орқали ўтиши кераклигини кўрсатишган. Колесниковнинг таъкидлашича, бу «ҳеч кузатилмаган ноодатий ҳодиса» бўлган: президентларга одатда «доимо мавжуд ва бирор устунчалар билан чегаралаб қўйиладиган» қўшимча ўтиш жойи очилади.
Путин Сингапурга 13 ноябрда 3 кунлик ташриф билан келди.