Тошкент шаҳридаги «Ёшлар ижод саройи»да мамлакат тараққиётига муносиб ҳисса қўшаётган бир гуруҳ ёшларга «Ўзбекистон белгиси» кўкрак нишонини топшириш тантанали маросими бўлиб ўтди.
Маросимда Ўзбекистон Ёшлар иттифоқи, Ўзбекистон Республикаси халқ таълим вазирлиги, Ўзбекистон Республикаси Маданият вазирлиги вакиллари давлат ва жамоат арбоблари, вазирлик, идора ва муассасаларнинг мутасадди раҳбарлари, Ўзбекистон ёшлар иттифоқи етакчилари ва фаоллари, «Ўзбекистон белгиси» кўкрак нишони совриндорлари ҳамда оммавий ахборот воситалари вакиллари қатнашди.
— 2003 йилдан бошлаб «Ўзбекистон белгиси» кўкрак нишони билан мукофотланган ёшлар сони 551 нафарни ташкил этди. Мазкур кўкрак нишони соҳиби бўлиш иштиёқидаги ёшларнинг сони йилдан-йилга ортиб бораётганлигини 2018 йилда танлов Комиссиясига мингга яқин ёшлар ҳужжати келиб тушганлигидан билишимиз мумкин, – дейди ёшлар етакчиси Қаҳрамон Қуронбоев. — Бу галги тақдирлаш аввалгиларидан фарқли ўлароқ, ўзининг меҳнатсеварлиги, фидойилиги ҳамда Ўзбекистон Республикаси обрўсини халқаро даражада юксалтиришга қўшган алоҳида ҳиссаси учун чет эл фуқаролари, яъни Россия ва Хитойдаги ҳамкорларимиз тақдирланадилар.
Илм-фан, маданият, таълим, соғлиқни сақлаш, санъат ва журналистика, спорт, қишлоқ хўжалиги ҳамда кичик бизнес, ҳуқуқ ва ҳарбий соҳаларда самарали фаолият олиб бораётган, илмий-ижодий фаолияти орқали юксак натижаларга эришаётган 41 нафар ёшларга соҳаларнинг фахрли вакиллари томонидан «Ўзбекистон белгиси» кўкрак нишони топширилди.
«Ўзбекистон белгиси» кўкрак нишони соҳибларини Ўзбекистон Республикаси президенти маслаҳатчиси Абдужаббор Абдувоҳидов қутлади. Республика «Маҳалла» хайрия жамоат фонди бошқарма раиси – Шавкат Жавлонов, Республика халқ таълим вазири – Шерзод Шерматов, Республика маданият вазирининг биринчи ўринбосари – Озодбек Назарбековлар «Ўзбекистон белгиси» кўкрак нишонларини тантанали равишда ўз эгаларига топширдилар.
Ғолиблардан бири Умиджон Ҳасанов қувончли куннинг таассуротлари билан бўлишди:
— Ватан ҳимояси учун ҳар биримиз масъулмиз. Шахсан ўзим Ўзбекистон Миллий гвардиясида хизмат қиламан. Камтарона хизматимизни юқори баҳолаб, «Ўзбекистон белгиси» кўкрак нишонига лойиқ топишгани менинг мисолимда тизимимиздаги ёшларнинг ҳам ютуғидир, — дейди Ўзбекистон Республикаси Миллий гвардияси ҳарбий-ватанпарварлик, маънавий-ахлоқий тарбия ва ёшлар билан ишлаш бошқармаси катта офицери Умиджон Ҳасанов. — Ҳозирги пайтда муҳтарам Президентимиз ташаббуслари билан қуролли кучлар тизимида ёшлар иттифоқининг бошланғич ташкилотлари тузилди. Бу ташкилотлар нафақат Ўзбекистон ёшлари, балки, ҳарбийларимиз учун ҳам ғоят муҳимдир. Қуролли кучларимизда хизмат қилаётган мард, жасур, ёшларни ягона бир мақсад — Ватан равнақи йўлида бирлаштириш асосий вазифамизга киради. Айтиш керак, Миллий гвардия тизимида ҳозирги пайтда 27 та бошланғич ташкилот тузилган бўлиб, уларга 4 минг 930 нафар бошланғич ташкилот аъзоси сифатида қабул қилинган. Келажакда аъзоларимизни янада кўпайтиришни мақсад қилганмиз.
Бугунги қувончли кунда «Россия ёшлар иттифоқи» Умумроссия жамоат ташкилоти раиси ўринбосари Татьяна Селиверстова ҳамда “Ҳи Чина” дунё ёшларини ривожлантириш форуми ижрочи президенти Лью Сининг алоҳида фаолияти ҳам мазкур мукофотга муносиб деб топилди.
Тақдирлаш маросимида сўзга чиққан ёшлар ҳамда хорижий меҳмонлар давлат раҳбарига юртимизда ёшлар камолоти йўлида кўрсатаётган доимий эътибори ва ғамхўрлиги учун миннатдорлик билдириб, Ватан равнақи ва халқ фаровонлиги, давлатлар ўртасидаги ўзаро манфаатли муносабатларни янада ривожлантириш йўлида астойдил хизмат қилишларини алоҳида таъкидлашди.
