Саранскда ҳомиладор хотинини ўлдирган ўзбекистонлик мигрант суд қилинади

Мордовияда Ўзбекистон фуқароси бўлган 25 ёшли эркак томонидан содир этилган шафқатсиз қотиллик ҳолати юзасидан жиноий ишни тергов қилиш якунланди. Унинг қурбонига 26 ёшли ҳомиладор рафиқаси айланган.

Мигрант жиноятни 2018 йилнинг 20 февралида Луховкада содир этган. Қотил ҳомиладорликнинг 30-ҳафтасида бўлган аёлни бўйинбоғ билан бўғиб ўлдирган. Шундан кейин у ўз жонига қасд қилмоқчи бўлган, лекин бу ғоядан воз кечди ва воқеа юз берган жойдан яширинди.

Орадан бир мунча вақт ўтгач, эркак полицияга келган ва қотиллик содир этганини тан олган. Мигрант қотилликка сабаб сифатида турмуш ўртоғининг қариндошларини келтирган, улар бу оила қурилишига қарши бўлишган ҳамда ажрашишни талаб қилишган. Жиноятчи ўз айбини тўлиқ тан олди, дея хабар беради РИА Инфо-РМ.

Эслатиб ўтамиз, аввалроқ Доғистонда Ўзбекистоннинг 25 ёшли фуқароси ўз рафиқасини ўлдирганликда гумонланаётгани хабар қилинганди.