Қурилиш вазирлиги: 2019 йилда 2010 та уй эҳтиёжманд аёлларга берилади

2019 йилда 2010 та уй ижтимоий аҳволи оғир, оиласида ногиронлиги бўлган хотин-қизлар, эҳтиёжманд, заифа аёлларга берилади. Kun.uz мухбири Халқаро Пресс-клуб сессияси доирасида Қурилиш вазири ўринбосари Эркин Искандаров тақдим этган маълумотларга асосланиб, шу ҳақида хабар берди.

Эркин Искандаров
Фото: Халқаро пресс-клуб

Искандаровнинг сўзларига кўра, бунда тўловнинг 25 фоизини Хотин-қизлар қўмитаси киритади, 75 фоизи Марказий банкнинг имтиёзли кредити асосида 20 йил давомида тўлаб борилади.

Эҳтиёжманд аёллар рўйхати Хотин-қизлар қўмитаси, маҳаллий ҳокимликлар ҳамда мутасадди раҳбарларнинг тавсияларига кўра шакллантирилади.

Таъкидланишича, 2018 йилда 1576 нафар эҳтиёжманд аёл имтиёзли уй-жой билан таъминланган. 2017 йилда 1237 та уй шундай тоифадаги аёлларга берилган.