Венесуэла армияси Мадурони қўллаб-қувватлашини эълон қилди   

Венесуэла мудофаа вазирлигининг расмий баёнотида мухолифатнинг хатти-ҳаракатлари жиноий ва миллат эркинлиги ҳамда суверенитетига рахна солувчи деб аталди. Ҳарбийлар мамлакат президенти Николас Мадурони қўллаб-қувватлашга ва хорижликларга бўйсунмасликка ваъда беришган.  

“Мадуро режимига қаршиларнинг ҳаракатлари “миллат эркинлиги, суверенитети ва мустақиллигига” рахна солади, параллел ҳокимиятнинг ташкил этилиши жамиятда алғов-далғовлик ва тартибсизликни келтириб чиқаришни мақсад қилган”, дейилган мудофаа вазирлиги баёнотида.

Баёнот муаллифлари ҳозирдаги каби сценарий тузумга қаршилар томонидан 2002 йилда ҳам қўллангани, мухолифатчилар ортида эса АҚШ ҳукумати туришини таъкидлаб ўтишган.  

“Биз Венесуэланинг қонуний президенти ва бош қўмондонимиз сифатида 2018 йил 20 майда эркин умумий сайловларда кўпчилик овоз билан сайланган Николас Мадурони тан оламиз”, дейилган баёнотда.

Вазирлик мамлакат қуролли кучлари Симон Боливар анъаналарига содиқ қолиб, халқ томонидан сайланмаган ва ўзини президент деб эълон қилган давлат раҳбарини ҳеч қачон қўллаб-қувватламаслигини айтган. 

“Биз хорижий ҳукуматлар томонидан амалга оширилаётган қонунсизликни қабул қилмаймиз. Биз фуқароларга тинчликни кафолатлаймиз ва ўз мақсадларига эришишнинг қабиҳ усули сифатида зўравонликни тарғиб қилувчи гуруҳлар томонидан жаҳолат ва террорчилик ҳолатларига йўл қўймаймиз”, деб таъкидлаб ўтилган ҳужжатда. 

21 январда мамлакат миллий гвардиячиларининг кичик гуруҳи қурол-аслаҳани қўлга киритиб, исён кўтаришга уринган. Ижтимоий тармоқларда миллий гвардия кийимида бўлган кишининг Мадурони ҳокимиятдан четлатишга чорлаган видеоси тарқалган. Бироқ кўп ўтмай исёнчилар махсус кучлар томонидан қуршаб олиниб, жангсиз таслим этилган.