АҚШ Сурияда 200 ҳарбийдан иборат контингентни қолдиради

Фото: U.S. Army photo by Spc. Zoe Garbarino via AP

АҚШ Суриядан ўз қўшинларини олиб чиққандан кейин 200 ҳарбийдан иборат “кичик тинчликпарвар контингенти”ни қолдиришни режалаштирмоқда. Бу ҳақда Оқ уйга иқтибос келтирган ҳолда Reuters ахборот агентлиги хабар берди.

“Тахминан 200 кишидан иборат кичик контингент Сурияда муайян муддатга қолади”, деб айтган Оқ уй матбуот котиби Сара Сандерс.

Сандерс бу қарорни “республикада тинчликни таъминлаш мақсади” билан тушунтирган. Таъкидланишича, ушбу қарор АҚШ президенти Дональд Трамп Туркия президенти Ражаб Тоййиб Эрдўған билан телефон орқали суҳбатлашгандан кейин эълон қилинган.

АҚШ президенти Дональд Трамп 19 декабрда Суриядан қўшинларнинг олиб чиқилишини эълон қилганди. У ўз қарорини ИШИД устидан ғалабага эришилгани ва террорчиларга қарши кураш АҚШ қуролли кучларининг Сурияда ҳаракат қилишининг ягона сабаби бўлгани билан тушунтирганди. Сурияда айни вақтда АҚШнинг 2 минглик қўшини бор.