«Ку-клукс-клан ҳукумати»: Мадуро Трампни айблаб чиқди

Венесуэла президенти Николас Мадуро Қўшма Штатларни Жанубий Америкада уруш бошлаш мақсадида сунъий инқирозни яратишда айблади. Бу ҳақда у Американинг ABC News телеканалига интервьюда айтиб ўтган.

«АҚШ ҳукумати қилган ҳамма нарса муваффақиятсизликка учраши аниқ эди. Улар Венесуэладаги сиёсий танглик ва ҳарбий аралашувни оқлаш учун инқирозни сохталаштиришга уринмоқдалар. Бу Жанубий Америкада уруш бошлаш учун керак», - дея маълум қилди Мадуро.

Венесуэла етакчисининг сўзларига кўра, Қўшма Штатлар «Венесуэла нефтини истайди» ва «бу нефть учун курашишга тайёр». Мадуро Трампдан қўрқаётгани ҳақидаги саволга жавоб қайтариб, АҚШ президентидан қўрқмаслигини айтди, лекин унинг атрофидаги кишилардан чўчиётганини билдирди.

«Дональд Трамп бошчилигидаги экстремистик кайфиятдаги Ку-клукс-клан ҳукумати нефть учун, баъзида эса нефтдан ҳам кўпроқ нарса учун уруш бошлашни хоҳламоқда», - деди Мадуро.

Венесуэла етакчиси Трампни Венесуэлага нисбатан сиёсатини ўзгартиришга чақирди. Унинг қўшимча қилишича, Венесуэла тинчлик учун ҳуқуққа эга ва Америка ҳукумати билан тўғридан-тўғри мулоқот қилишга тайёр. Мадуронинг таъкидлашича, у доимо «ташқарига қўл узатиш» ҳамда тинч мулоқотни бошлашга тайёр инсон бўлиб қолади.

«Биз - жанубий америкаликлар, сизлар - шимолий америкаликлар. Келинг, совуқ уруш даври қарорларини эмас, балки XXI аср ечимларни кўриб чиқамиз. Совуқ уруш ортда қолиши керак», - деди Мадуро.

Унинг сўзларига кўра, Трамп «янги йўлни» бошлаш учун «Венесуэла ҳақиқатини билиши» ва «медалнинг бошқа томонини» кўришга тайёр бўлиши керак. Бундан ташқари, Мадуронинг маълум қилишича, Венесуэлада сиёсий фикр, матбуот эркинлиги тўлиқ даражада бор.

Эслатиб ўтамиз, аввалроқ Гуайдо Венесуэла ҳарбийлари унга қандай ёрдам берганини айтганди.