Қаршига элтувчи абгор йўллар: йўловчилар шикоятда, мутасаддилар хижолатда

Kun.uz таҳририятига Самарқанддан Қашқадарё вилоятига кириб борилганида Хўжаобод аҳоли пунктидан вилоят маркази Қарши шаҳрига элтувчи 4Р87 автомобиль йўлининг аҳволидан шикоят билдирилган мурожаатлар бўлди.

48 км йўлнинг Қаршидан Тошкент томон чиқаверишдаги қарийб 10 км қисми икки йилча муқаддам замонавий қилиб мукаммал таъмирланган ва асфальт ётқизилган.

Узунлиги 48 км бўлган мазкур йўл бундан 20 йилча муқаддам тўғри чизиқ қилиниб, капитал таъмирланган эди. Унинг айрим жойлари бутунлай бошқатдан барпо этилган, ҳанузгача эски йўлга кўзингиз тушиши мумкин.

Янги барпо этилган йўлнинг аҳволи ёмонлигидан, айрим автомобиллар ўша 20 йил муқаддам ёпилган йўлдан юришмоқда.

Лекин йиллар ўтиб, фақат жорий таъмир қилиб келинган мазкур асосий йўлнинг аҳволи бугунги кунда ҳавас қиладиган даражада эмас.

Қолган 38 км йўлнинг аксарият қисми ёрилиб кетган. Айрим жойларида асфальт қопламаси кўчиб кетган.

Қашқадарёнинг Қарши шаҳри, Қарши тумани, Нишон, Косон, Миришкор, Муборак каби туманлари аҳолиси пойтахт ва бошқа вилоятларга йўл олиши учун қир-адирлар ўртасидан солинган мана шу йўлдан юришади. Бу уларга катта қийинчилик келтириб чиқармоқда. Йўллардаги чуқурлар машиналар шинаси ёрилишига сабаб бўлмоқда.

Биз мазкур масала юзасидан қашқадарёлик йўлсозлардан изоҳ сўрадик. Вилоят автомобил йўллари ҳудуддий бош бошқармаси бошлиғи ўринбосари Ҳусниддин Камолов бизга қуйидагича тушунтириш берди:

«Очиғи, бу йўл ўтган йилги мукаммал таъмирлаш дастурига кирмай қолди. Мана, сизга ҳужжатларни тақдим этаман, бу йилги дастурдан мазкур йўлнинг таъмирланиши ўрин олган. Лойиҳа қилинган, экспертизадан ўтказилган ва республика даражасида ҳимоя қилиб келинган.

Ўтган йили йўлни жорий таъмирлашга уриниб кўрганимизда битум танқислиги юзага келди. Чунки Қашқадарёда йўллар кўп қурилмоқда. Ҳозир аввало халқаро аҳамиятдаги йўлларни таъмирлаш устида қизғин иш кетмоқда.

Яқинда икки марта йўлнинг ўнқир-чўнқир қисмларини ямаб бартараф этиш учун таъмирлаш олиб бордик. Лекин қишнинг совуқ кунларида таъмирлаш сифати йўқолади.

Бу йил битум етарли даражада бор. Январь ойининг ўзида Россиядан 6 минг тонна битум келтирилди. Энди май ойигача мазкур 4Р78 йўлининг яна 5 километр қисми тўлиқ капитал таъмирланади. Қолган қисми жорий таъмирланиб, хавфсиз кўринишга келтирилади».

Йўл — иқтисодиётнинг қон-томири, маълум бир ҳудуднинг юзи, муҳим инфратузилма объекти ҳисобланади. Одамларнинг узоғини яқин қилувчи йўлларимиз, албатта, равон бўлиши керак.

Қашқадарёлик мутасаддилар, вилоят раҳбарлари мазкур ҳолатга жиддий эътибор қаратишади, деган умиддамиз. Ваъдалар берилди. Биз унинг бажарилишини албатта кузатамиз ва мавзуга яна қайтамиз.

Шуҳрат ШОКИРЖОНОВ,

Kun.uz мухбири