Венесуэлада Гуайдо мамлакатга қайтса қўлга олиниши айтилди 

Венесуэла мухолифати етакчиси Хуан Гуайдо Венесуэла чегарасини кесиб ўтиб, мамлакатга қайтишга уринса қўлга олинади. Бу ҳақда Варгас штати губернатори Хосе Луис Гарсиа Карнейро айтиб ўтди. Карнейро узоқ йиллар давомида мамлакатнинг марҳум президенти Уго Чавеснинг яқин сафдошларидан бири бўлган, 2004-2011 йиллар давомида Венесуэла мудофаа вазири лавозимида ишлаган.

“Венесуэла олий суди унга мамлакатдан чиқишни тақиқлаганди, у бўлса бу қарорга амал қилмаган. Суд қарорига кўра, у чегарани кесиб ўтишга уринса, қўлга олиниши керак”, деб жавоб қилган Карнейро Гуайдо у бошқараётган штат орқали қайтишга уринса у билан нима бўлиши ҳақидаги саволга.

22 февралда мамлакатни тарк этган Гуайдо 4 ёки 5 март куни Венесуэлага қайтмоқчилигини айтган. Ҳозирча у буни қандай амалга оширмоқчилиги номаълум. У авиарейсдан ташқари, Венесуэлага хусусий самолётда ёки гуманитар карвон ёрдамида чегарани кесиб ўтишга уриниши мумкин.

Карнейронинг айтишича, мамлакат қуролли кучлари исёнга чақириқларга қарамай қонуний ҳукуматни қўллаб-қувватламоқда.