Жеймс Бонднинг янги машинаси электрокар бўлади

Британия разведкаси жосуси Жеймс Бонд ҳақидаги янги “Shatterhand” номли 25-фильмда махфий агент электрокарда ҳаракатланади. Аввалги қисмлардагидек бу Aston Martin машинаси, аниқроғи марканинг илк электрокари Rapide E лифтбеги бўлади.

Фильм режиссёри Кэри Фукунагининг айтишича, унинг жамоаси автомобилни суратга олиш ишлари бошлангунгача вақтида тайёрлаш учун Aston Martin билан биргаликда ишламоқда. Режиссёр электрокарга катта умид боғламоқда, чунки сценарий бўйича машина “ақлбовар қилмас воқеалар марказида” бўлади.

Rapide E орқа ғилдиракларни айлантирувчи иккита электромотор билан жиҳозланган. Уларнинг умумий қуввати 610 от кучини ташкил қилади. 65 киловатт-соатли батарея машинага қайта қувватлашсиз 322 километр йўл босишга имкон беради, уни 100 киловаттлик терминалдан қувватлашга 40 дақиқа кетади. Машина 97 км/соат тезликка 4 сониядан камроқ вақт сарфлайди. Унинг максимал тезлиги 250 км/соатни ташкил қилади. 

Электр лифтбек жорий йилнинг 4-чорагидан мижозларга етказиб берила бошланади.

Бонд ҳақидаги охирги “007: Спектр” фильмида жосус Aston Martin DB10 моделидаги машинада ҳаракатланган. Бу концептуал купе атайлаб фильм учун ишлаб чиқилган ва 10 дона чиқарилган. 2016 йилда ушбу автомобиллардан биттаси 2,4 млн фунт стерлингга сотилган.