Испанияда банкларни тунаган “қароқчи чоллар” қўлга олинди

Испания полицияси Барселонада икки банкка ҳужум қилган ва Мадридда шундай ўғриликни режалаштирган икки кекса эркакни қўлга олди.

Таъкидланишича, қўлга олинган ўғрилар 73 ва 80 ёшда бўлган.

Ўғриликлар бир хил режа бўйича 2 ой фарқ билан амалга оширилган – эркаклар ёруғлик акслантирувчи кийимда банк бўлимларига бостириб кириб, банк ходимларига қурол билан таҳдид қилиб, улардан сейфлардаги пулларни беришни талаб қилишган. Сўнгра банк ходимлари ва мижозларнинг қўлларини боғлаб, воқеа жойидан жамоат транспортида жўнаб қолишган. Улар биринчи ўғриликда 32 минг евро, иккинчисида 45 минг евро қўлга киритишга муваффақ бўлишган.

“Қароқчи чоллар” шундай ўғриликни Мадридда ҳам амалга оширишмоқчи бўлишган-да, ҳибсга олинганлар. Эркакларни ушлаш бўйича Вендрель муниципалитетида операция ўтказилган. Жиноятчиларнинг бирининг уйида марихуана плантацияси аниқланган. Бу плантация яна бошқа бир эркакка тегишли бўлган, у ҳам ҳибсга олинган.

Иккинчи ўғри Мадридда ушланган. Шунингдек, навбатдаги ўғриликни амалга оширишга алоқадор бўлган яна бир киши қўлга олинган.  

Қўлга олинган жиноятчилар Жанубий Америка давлатларининг биридан бўлиб, Италияда амалга оширган бир қатор жиноятлари учун қидирувда бўлганлар. Испаниядаги операция миллий полиция ва Каталония полицияси ходимлари ҳамда италиялик карабинерлар иштирокида ўтган.