Қиморхонадаги марихуана олди-сотдиси фош қилинди

Сурхондарё вилояти божхона бошқармаси Контрабанда ва божхона қонунчилиги бузилишига қарши курашиш бўлими ходимлари ҳуқуқни муҳофаза қилувчи бошқа орган вакиллари билан ҳамкорликда наркотик моддаларнинг олди-сотдисига қарши тезкор тадбир ўтказди, деб хабар бермоқда Давлат божхона қўмитаси матбуот хизмати.  

«Тадбир давомида, фуқаро А.Н.нинг яшаш хонадони белгиланган тартибда кўздан кечирилди. Натижада фуқаро ўз уйини қиморхонага айлантириб, у ернинг ўзида наркотик моддалар олди-сотдиси билан шуғулланаётгани маълум бўлди. Мазкур хонадон холислар иштирокида кўздан кечирилганда, 3 дона гугурт қутиларига жойланган гиёҳвандлик воситаси борлиги аниқланди», — дейилади қўмита ахборотида. 

Экспертиза хулосасига мувофиқ, олинган ашёвий далиллар вазни 17,8 граммни ташкил этувчи «марихуана»  экани тасдиқланган.

Ҳозирда мазкур ҳолат юзасидан жиноят иши қўзғатилган бўлиб, терговгача текширув ҳаракатлари давом эттирилмоқда.