Андижонда йирик миқдорда гиёҳвандлик воситаси сақлаган шахс ушланди

Наркожиноятларга қарши курашиш йўналишида Андижон вилоятининг Жалақудуқ туманида тезкор тадбир ўтказилди.

Фото: Видеодан кадр

Тадбир давомида 1950 йилда туғилган, муқаддам судланган фуқаро ўзининг яшаш хонадонида келгусида сотиш мақсадида йирик миқдорда гиёҳвандлик воситасини сақлаб келаётганлиги аниқланди.

Текширув жараёнида жами 20 кг 400 грамм “марихуана” гиёҳвандлик воситаси топилиб, ашёвий далил сифатида белгиланган тартибда расмийлаштириб олинди.

Ҳозирда мазкур ҳолат юзасидан фуқарога нисбатан жиноят иши қўзғатилиб, суриштирув-тергов ҳаракатлари олиб борилмоқда.