ИШИД сафига ўтиб кетган россиялик офицер 19 йилга қамалди

Шимолий Кавказ округ ҳарбий суди Россия мудофаа вазирлиги собиқ ходими Денис Хисамовни 19 йилга озодликдан маҳрум қилди, деб хабар берди ТАСС. Хабарда айтилишича, у Сурияда бир йил давомида ИШИД террорчилик ташкилоти жангарилари сафида жанг қилган.

У жазони қатъий тартибдаги колонияда ўтайдиган бўлди. У шунингдек, сохта пул чиқарганликда айбланиб бир йилга озодликдан чеклаш жазоси ҳам берилди ва захирадаги капитан унвонидан маҳрум қилинди.

Агентликнинг билдиришича, офицер 2009 йилда хизматдан бўшаган ва ўз бизнесини бошлаган. У масжидда тожикистонлик шахс билан танишиб қолган ва биргаликда сохта пул чиқариш билан шуғулланишган. Улар 2015 йилда қўлга олинган, аммо Хисамов Сурияга қочиб кетишга муваффақ бўлган. У Раққа шаҳрида ИШИД жангарилар лагерида ҳарбий тайёргарликдан ўтган ва Сурияда ИШИД тарафида туриб жангларда қатнашган.

У 2016 йилда Туркияга келиб, валюта алмаштириш пунктини талаган ва олинган пулларни Сурияга жўнатиш учун берган.

Хисамов 2017 йил апрелда Туркияда қўлга олинган ва Тожикистонга депортация қилинган. У ерда унинг паспорти қалбаки эканлиги аниқланган ва Москвага депортация қилинган.