Суд «Янгиобод» турбазаси эгасининг апелляциясини қаноатлантиришни рад этди

Тошкентда 30 апрель куни Тошкент вилоят маъмурий суди апелляцион инстанциясининг «Янгиобод» турбазасининг олиб қўйилиши иши бўйича иккинчи мажлиси бўлиб ўтди, деб хабар берди Kun.uz мухбири.

Суд турбаза эгаси Али Тўхтаевнинг апелляцион шикоятини қаноатлантиришни рад этди ва Нурафшон шаҳар маъмурий судининг 2019 йил 19 мартдаги қарорини ўзгаришсиз қолдирди. Ўшанда Тошкент вилояти ҳокими Ғуломжон Иброҳимовнинг объектни давлат фойдасига олиб қўйиш тўғрисидаги қарорини нотўғри деб топиш рад этилганди.  

«Тошкент вилояти Нурафшон шаҳар маъмурий судининг қарори ўзгаришсиз қолдирилсин», – деди мажлис якунига кўра судья Исматилла Маманов.

Турбаза юристи Азим Раҳматовнинг ҳоким қарор чиқаришга асосланган ҳукуматнинг 2019 йил 23 январдаги фармойишини кўрсатиш ҳақидаги такрорий илтимоси рад этилди. 23 апрелда бўлиб ўтган мажлисда Тошкент вилоят маъмурий суди коллегияси илтимосни қаноатлантирган ва фармойишни кўрсатишни сўраганди.

Бугунги мажлисда ҳокимнинг ишончли шахси сифатида қатнашган юрист Абдумутал Асроров ҳокимлик мазкур фармойиш нусхасини кўрсатиш ваколатига эга эмаслигини билдирди. У даъвогарга бевосита ҳукуматга мурожаат қилишни маслаҳат берди. Бундан ташқари, ҳокимнинг вакили:"Фармойишда айнан мана шу турбаза кўрсатилганми?", деган саволга жавоб бермади.

Азим Раҳматовнинг таъкидлашича, ҳокимнинг қарори қонунчиликни бузган ҳолда қабул қилинган. Ҳокимлик вакили «давлат ва жамоат эҳтиёжи учун» деган сўзлар бўлган Вазирлар Маҳкамаси фармойишига таянган ҳолда мулк олиб қўйилишининг аниқ сабабини айтмаяпти.