Sud «Yangiobod» turbazasi egasining apellyatsiyasini qanoatlantirishni rad etdi

Toshkentda 30 aprel kuni Toshkent viloyat ma'muriy sudi apellyatsion instansiyasining «Yangiobod» turbazasining olib qo‘yilishi ishi bo‘yicha ikkinchi majlisi bo‘lib o‘tdi, deb xabar berdi Kun.uz muxbiri.

Sud turbaza egasi Ali To‘xtayevning apellyatsion shikoyatini qanoatlantirishni rad etdi va Nurafshon shahar ma'muriy sudining 2019 yil 19 martdagi qarorini o‘zgarishsiz qoldirdi. O‘shanda Toshkent viloyati hokimi G‘ulomjon Ibrohimovning obektni davlat foydasiga olib qo‘yish to‘g‘risidagi qarorini noto‘g‘ri deb topish rad etilgandi.  

«Toshkent viloyati Nurafshon shahar ma'muriy sudining qarori o‘zgarishsiz qoldirilsin», – dedi majlis yakuniga ko‘ra sudya Ismatilla Mamanov.

Turbaza yuristi Azim Rahmatovning hokim qaror chiqarishga asoslangan hukumatning 2019 yil 23 yanvardagi farmoyishini ko‘rsatish haqidagi takroriy iltimosi rad etildi. 23 aprelda bo‘lib o‘tgan majlisda Toshkent viloyat ma'muriy sudi kollegiyasi iltimosni qanoatlantirgan va farmoyishni ko‘rsatishni so‘ragandi.

Bugungi majlisda hokimning ishonchli shaxsi sifatida qatnashgan yurist Abdumutal Asrorov hokimlik mazkur farmoyish nusxasini ko‘rsatish vakolatiga ega emasligini bildirdi. U da'vogarga bevosita hukumatga murojaat qilishni maslahat berdi. Bundan tashqari, hokimning vakili:"Farmoyishda aynan mana shu turbaza ko‘rsatilganmi?", degan savolga javob bermadi.

Azim Rahmatovning ta'kidlashicha, hokimning qarori qonunchilikni buzgan holda qabul qilingan. Hokimlik vakili «davlat va jamoat ehtiyoji uchun» degan so‘zlar bo‘lgan Vazirlar Mahkamasi farmoyishiga tayangan holda mulk olib qo‘yilishining aniq sababini aytmayapti.