Россиянинг «Лукойл» йирик хусусий нефть ширкати жорий йилнинг биринчи чораги учун дастлабки ишлаб чиқариш натижаларини эълон қилди.
«Ғарбий Курна-2» лойиҳасини ҳисобга олмаганда, углеводородларнинг ўртача кунлик ишлаб чиқариш ҳажми 2 379 минг баррелни ташкил этди. Бу 2018 йилнинг биринчи чорагига нисбатан 4,1% ва 2018 йилнинг тўртинчи чорагига нисбатан 0,3%га кўпдир.
«Ишлаб чиқаришнинг ўсиши асосан Ўзбекистондаги газ лойиҳаларини ривожлантириш билан боғлиқ», - дея таъкидлади компания.
«Ғарбий Курна-2» лойиҳасини ҳисобга олмаган ҳолда нефть қазиб олиш 21,2 миллион тоннани ташкил этди, бу 2018 йилнинг биринчи чорагидаги кўрсаткичдан 1,5 фоизга юқори ва 2018 йилнинг тўртинчи чорагидаги кўрсаткичдан 0,5 фоизга кам.
Газ қазиб олиш ҳажми 9 миллиард кубометрни ташкил этди. Яъни, 2018 йилнинг биринчи чорагига нисбатан 12 фоизга кўп.
«Газ қазиб олиш кўпайишининг асосий омили Ўзбекистондаги лойиҳаларни ривожлантириш бўлди. Қандим лойиҳасидаги газни қайта ишлаш комплекси иккинчи босқичи ишга туширилганлиги туфайли, 2019 йил биринчи чорагида Ўзбекистонда газ қазиб олиш 3,8 млрд куб метрга етди (компаниянинг улушида). Бу 2018 йилнинг биринчи чорагига нисбатан 33%га кўп», - дея аниқлик киритган компания.
