«Атлетико» ҳужумчиси Антуан Гризманнинг «Барселона»га трансфери амалга ошмаслиги мумкин.
Diario sport хабарига кўра, Каталония клуби футболчилари Антуан ҳақидаги янгиликлардан хурсанд эмас. «Барса» ўйинчилари раҳбариятга ўз позицияларини маълум қилишган: гарчи трансфер бўйича қарорни раҳбарият қабул қилса-да, футболчилар бунга қарши эканликларини билдиришган.
«Кўк-анорранглилар»нинг қаршилиги биринчи навбатда Гризманнинг ўтган йилги рад жавоби билан боғлиқ. Клуб уни ўтган ёзда ҳам ўз таркибига қўшиб олмоқчи бўлган, аммо франциялик ҳужумчи рад жавобини бериб, буни шоуга айлантириб юборганди. Унинг «Қарор» ҳужжатли фильмидаги ҳаракатларини мухлислар ва «Барселона»дагилар ушбу клубга нисбатан ҳурматсизлик деб баҳолашган. Боз устига, у шундан сўнг «Атлетико» билан шартномасини узайтирган ҳам.
Қолаверса, Лионель Месси Гризманн билан телефон орқали суҳбатлашгани ҳақидаги хабарлар нотўғри эканига жамоадошларини ишонтирган.
Қўшимча қилинишича, Испания чемпиони сафидаги етакчи футболчилар Антуанни футболчи-кадр сифатида ҳам қабул қилишмаяпти. Улар таркибда Гризманнга жой йўқ, деб ҳисоблашмоқда.
«Бундан ташқари, у шамол қаерга эсишига қараб ўз фикрини ўзгартирадиган буқаламун ҳамдир», – деган «Барселона» футболчиларидан бирининг сўзларини келтирган нашр.
Клуб раҳбариятининг мазкур масаладаги қарори ҳозирча номаълум. Апрель ойи ўрталарида «Барселона» президенти Хосеп Мария Бартомеу бу ҳақдаги миш-мишларга қуйидагича муносабат билдирганди.
«Охирги сўзни доимо футболчининг ўзи айтади. Буюк ўйинчилар улкан клубларда ўйнайдилар, трансфер қилиш учун уларни кўндириш керак бўлади.
«Барселона» футболчилари билан Гризманн ҳақида гаплашганим йўқ. Биз бу борада «Атлетико» билан музокара ўтказмаяпмиз. Гризманн ва унинг атрофидагилардан ҳам ҳозирча ҳеч қандай хат-хабар бўлгани йўқ», – деганди Бартомеу.
