Қайси футбол юлдузларининг трансфер нархи пастга қулади? Transfermarkt маълумотлари билан танишамиз.
7-15. Жером Боатенг, -25 млн
Transfermarkt порталининг баҳолашича, «Бавария» марказий ҳимоячисининг нархи бир йилда 45 млн евродан 20 млн еврогача тушган. Мюнхенликлар клуби Боатенгни тахминан шу суммага сотмоқчи. Унинг ўйини сўнгги мавсумда ишқибозлар ва раҳбариятни қониқтирмади.
7-15. Месут Ўзил, -25 млн
Ўзил – Германия термасининг олдинги даражасини ушлаб туролмай қолган яна бир собиқ футболчиси. Унинг трансфер нархи 50 млн евродан 25 млн еврога тушиб қолди. Шубҳасиз, «Арсенал» раҳбарияти бу футболчини сотиб юбориши Унаи Эмерини хурсанд қилади, чунки шу орқали мураббий янги футболчилар хариди учун кўпроқ пулга эга бўлади.
7-15. Томас Мюллер, -25 млн
Россияда бўлиб ўтган жаҳон чемпионати даврида ва ундан сўнг немис футболчиларига нимадир бўлди. Сўнгги мавсум Мюллер учун ҳам самарасиз ўтди. «Бавария» ҳужумчиси Бундеслигада атиги 6та гол урди, унинг нархи эса 60 млн евродан 35 млн еврогача пастлади.
7-15. Матс Ҳуммельс, -25 млн
«Бавария» аллақачон Дортмунднинг «Боруссия»сига сотиб юборган Ҳуммельс ҳам немис футболчиларидаги кўнгилсиз ҳолатни давом эттирди. Ваҳоланки, Transfermarkt таҳлилчилари унинг баҳосини 60 млн евродан 30 млн еврога тушиб кетганини таъкидлашган. Лекин футболчидан шу қадар кўнгли тўлмаган Германия чемпиони Матсни янада арзонроқ нархда сотиб юборди.
7-15. Гонсало Игуаин, -25 млн
На «Милан»даги ярим йил, на «Челси»даги мавсум Игуаинга омад келтирди. Ҳужумчи А Серияда 6та, Премьер-Лигада 5та гол урди. Умуман олганда, ундан кўпроғини кутишганди. Шу сабабли Игуаиннинг баҳоси аввалги 60 млн евродан пастлаб, 35 млн еврога тенглашиб қолди.
7-15. Тома Лемар, -25 млн
Бир йил аввал «Атлетико» Лемар учун «Монако»га 70 млн евро тўлаганди. Француз ўйинчисининг муваффақиятсизлиги сабабини унинг ўзи шундай ифодалаган: «Менинг ўйнаш услубим «Атлетико»никидан фарқ қилади, Симеоне эса мен учун бутун бошли ҳужум чизиғи борасидаги фикрларини ўзгартирмайди».
Тома мавсумда 2 гол урди ва бир йил олдин 65 млн еврога баҳоланган футболчининг бугунги кундаги нархи 40 млн.
7-15. Сергей Милинкович-Савич, -25 млн
Серб яримҳимоячисига ўтган йили «Лацио» юқори баҳо бериб юборганди ва у учун таклиф қилинган 90 млн еврони қабул қилишмаганди. Холис таҳлилчиларнинг фикрига кўра, ҳозирги кунда Сергейнинг трансфер қиймати 65 млн еврони ташкил этмоқда. Милинкович-Савичнинг мавсумдаги статистикаси ҳам ҳамин қадар: 5 гол, 3та голли узатма.
7-15. Роберт Левандовски, -25 млн
«Бавария» ҳужумчиси 33 ўйинда 22та гол билан Бундеслигада тўпурарга айланиб ажойиб натижа қайд этди. Аммо 30 ёшга тўлгани муносабати билан Левандовскининг трансфер баҳоси 90 млн евродан 65 млн еврога тушиб қолди.
7-15. Пауло Дибала, -25 млн
Дибала 25 ёшга тўлган бўлса ҳам, унинг ўзига хос таланти ҳақида гапиришади. «Ювентус» сафида Криштиану Роналду пайдо бўлиши эса аргентиналик ҳужумчининг асосий таркибга кириш имкониятларини йўққа чиқарди. Дибаланинг А серияда 5та гол ургани, экспертлар фикрига кўра, 110 млн евро ўрнига 85 млн евролик нарх келиб чиқишига сабаб бўлди.
4-6. Серхио Бускетс, -30 млн
Бир пайтлар Бускетс «Барселона» ўйинидаги асосий фигуралардан бири эди. Лекин якунланган мавсум марказий ҳимоя чизиғи вакили учун омадсиз ўтди ва бу, албатта, унинг нархига ҳам ўз таъсирини кўрсатди. Аввал 80 млн евро Серхио учун яхши баҳо бўлган бўлса, ҳозирда фақат 50 млн евро беришади.
4-6. Гарет Бейл, -30 млн
6 йил аввал «Реал» Бейлни 101 млн евро эвазига «Тоттенҳем»дан сотиб олганди. Муваффақиятсиз ўтган 2018/19 йилги мавсумдан сўнг, ҳозирда уэльслик футболчи учун 60 млн евро таклиф қилишади, холос. Бу ўтган йилгига нисбатан ярим баравар кам. Агар ҳужумчи Мадрид клуби билан шартнома имзоламасдан гольф ўйнашда давом этишга тайёр бўлса, нарх тез орада кулгили ҳолатга келади.
4-6. Лионель Месси, -30 млн
Агарда исталган бошқа футболчи бир мавсумда 51та гол ва 22 голли узатмани амалга оширган бўлганда, унинг нархи космик даражагача чиққан бўларди. Шундоқ ҳам Мессини 180 млн еврога баҳолашган. Аргентиналик футболчининг трансфер баҳоси ҳозирда 150 млн еврога тушиб қолишига сабаб эса унинг ёши. У энди 31 ёшда.
1-3. Марсело, -35 млн
Ўтган мавсум Марсело учун худди Бэйл билан бўлгани каби омадсиз ўтди. Чемпионлар Лигасидаги кетма-кет 3 ғалабадан сўнг бразилиялик ҳимоячи ўйинида пасайиш бошланганди. Аввалроқ «Реал» бу ҳимоячиси учун 60 млн евро нарх белгиланган бўлса, ушбу ёзда 25 млн еврони ташкил этмоқда.
1-3. Диего Коста, -35 млн
«Челси» сафидан қайтариб олинган Костадан «Атлетико»да мутлақо бошқа натижа кутишганди. Ўтган мавсумда эса у атиги 2 гол урди. Жароҳат ва дисквалификациялар ҳам ўз таъсирини кўрсатгани 60 млн евро ўрнида 25 млн евро пайдо бўлганини мантиқан изоҳлайди.
1-3. Алексис Санчес, -35 млн
Агар унутган бўлсангиз, чилилик футболчи ҳозирда «Манчестер Юнайтед» аъзоси ҳисобланади. Якунланган мавсумда у АПЛ ва кубок баҳсларида биттадан гол урди, холос. Ишқибозлар унинг ўйинидан эмас, аҳмоқона даражадаги юқори маошидан ҳайратда. Санчеснинг тахминий нархи 2 баробар, яъни аввалги 70 млн евродан 35 млн еврога пастлаган.
