Фаол бўлмаган депутатлар ваколатига чек қўйилади

Ўзбекистон ʼʼМиллий тикланишʼʼ демократик партияси Тошкент шаҳар кенгашининг навбатдаги йиғилиши бўлиб ўтди, деб ёзмоқда ЎзА.

– Бугун сиёсий партия фаоллари амалга оширган ташаббуслар кириб бормаган хонадон йўқ. Аммо бу билан ҳаммасига эришдик, демоқчи эмасмиз. Шу тарзда янада бирдам бўлиб ишлашимиз керак, – дейди партиянинг Тошкент шаҳар кенгаши раиси ўринбосари Васила Файзиева. – Жараёнларда асосан ёрдамга муҳтож хотин-қизларга эътибор қаратяпмиз. Ҳудудларда вақтинча ишсиз, касб-ҳунарга эга бўлмаган хотин-қизларга бепул тикувчилик, бичувчилик, тўқувчилик ўргатиладиган ўқув курслари ва тўгараклар ташкил этдик. Мақсадимиз ҳар бир аёлни касбга йўналтириш.

Тадбирда кун тартибига қўйилган қатор мавзулар муҳокама қилинган. Партия аъзоларини янада фаолликка чақириш, ёшларни сиёсий жараёнларга жалб қилиш, аёл депутатлар сонини ошириш ва хотин-қизлардан келадиган мурожаатларни кўриб чиқишда бу янада ижобий самара бериши қайд этилган.

Шу билан бирга, энди фаол бўлмаган, ваколати доирасидаги вазифаларни уддалай олмайдиган депутатлар фаолиятидан четлатилиши таъкидланди.