«Пари-Сен-Жермен» бразилиялик ҳужумчиси Неймар билан хайрлашишга қарор қилган.
Sport.es манбаси маълумотига кўра, бразилиялик бу футболчининг парижликлар клубини тарк этиши тўхтатиб бўлмас жараён ҳисобланади. Франция чемпионлари раҳбарияти бу вазиятда футболчини сотиш, деган қарорга келишган. 27 ёшли футболчининг ўзи «Барселона»га қайтишни истамоқда. Шунинг учун, «ПСЖ» кўк-анорранглилар билан эҳтимолий трансфер имкониятларини ўрганмоқда.
Sky Germany нашри хабарига кўра, «Барселона» «Пари Сен-Жермен»га Неймар трансфери бўйича янги таклиф йўллаган. Каталонияликлар унинг қайтиши учун 100 млн еврога қўшиб икки футболчисини бермоқчи.
«Барселона» «ПСЖ»га олти футболчиси рўйхатини тақдим этган, рўйхатдан вингерлар Филиппе Коутиньо, Усмон Дембеле ва Малком, яримҳимоячи Иван Ракитич ва ҳимоячи Нелсон Семеду номи ҳам бор. Аммо Коутиньо, Дембеле ва Ракитич клубдан кетишни истамаяпти.
Немис нашрининг ёзишича, «Барселона» ва «ПСЖ» ўртасидаги музокаралар осон кечмайди, аммо каталонларнинг янги таклифи — катта қадам бўлиши мумкин. Бундан аввалроқ «ПСЖ» Неймарни кўк-анорранглиларга 40 млн евро ва бир неча футболчи эвазига беришга рози бўлмаганди. Французлар клуби бразилиялик футболчини 250 млн еврога баҳолаган.
Ўз навбатида, El Chiringuito Неймар фаолиятини «Ювентус»да давом эттириши мумкинлиги тўғрисида хабар тарқатди.
Манба маълумотига кўра, парижликлар бразилиялик футболчисини туринликларнинг аргентиналик ҳужумчиси Пауло Дибала ва муайян миқдордаги маблағга алмашиши мумкин.
Дибала якунланган мавсумда жамоасининг 42 учрашувида майдонга тушган ва 10 гол уриб, 6 голга узатма берган. Футболчининг «Ювентус» билан шартномаси 2022 йилгача тузилган. Форварднинг трансфер қиймати 85 млн еврога тенг.
Неймар 2013 йилдан 2017 йилгача «Барселона»да ўйнаган. У «ПСЖ»га 2017 йил ёзида «Барселона»дан 222 млн еврога ўтиб, футбол тарихидаги энг қимматбаҳо футболчига айланганди. Унинг Париж клуби билан амалдаги шартномаси 2022 йилга қадар тузилган. Ўтган мавсумда у клубининг барча турнирлар доирасидаги 28 учрашувида майдонга тушиб, 23 гол урган ва 13 голга узатма берган.
