«Барселона» собиқ ҳужумчиси Неймар фирибгарлик иши бўйича оқланди

Испания Олий суди «Барселона» собиқ ҳужумчиси Неймар, шунингдек, клубнинг собиқ президентлари Сандро Росел ва Жозеп Мария Бартомеуга нисбатан 2013 йилда бразилиялик футболчининг трансферида коррупция ва фирибгарлик айбловлари бўйича оқлов ҳукмини тасдиқлади.

Неймар 2013 йилда Бразилиянинг «Сантос» клубидан 57,1 миллион евро эвазига Каталония клубига ўтди. Кейинроқ «Барселона» қўшимча тўловлар ҳақида гапирди, футболчининг отаси эса ўғли учун тахминан 100 миллион евро тўланганини айтди.

Иш 2016 йилда Бразилиянинг DIS инвестиция компанияси томонидан қўзғатилган бўлиб, у Неймарга нисбатан иқтисодий ҳуқуқларнинг 40 фоизига эгалик қилган, бироқ футболчига фақат трансфер келишиб олингандан кейингина бошқа клубга ўтишга рухсат берадиган федерал ҳуқуқларга эга эмас эди. Суднинг таъкидлашича, ФИФА қоидаларига кўра, клублар келишувга эришмагунча, федерал ҳуқуқлар ўтказилмайди. Шунинг учун DIS «Барселона»нинг футболчи ёки унинг отаси билан музокараларини тўсиб қўя олмади.

Ишнинг асосий элементи 2011 йил 15 ноябрдаги, яъни ҳақиқий трансфердан икки йил олдинги келишувдир. Ўшанда Неймарнинг «Сантос» билан шартномаси 2014 йилгача эди, шунинг учун «Барселона» футболчини сотиб ололмади, фақат келажакда уни сотиб олиш ҳуқуқини сақлаб қолди. Клуб Неймарнинг отасига 40 миллион евро тўлади - бу трансфер учун эмас, балки бразилиялик эркин агентга айланган тақдирда опцион (афзаллик учун мукофот) эвазига. DIS бу пулларни пора ва трансфернинг ҳақиқий миқдорини яшириш деб атади, аммо суд тўловни қонуний деб топди.

Кутилганидан фарқли ўлароқ, «Барселона» Неймарнинг 2014 йилда эркин агент мақомини олишини кутиб ўтирмади, балки 2013 йилдаёқ «Сантос» билан трансфер бўйича келишиб, клубга 17,1 миллион евро тўлади (шундан DIS ўзининг 40 фоизини - 6,84 миллион еврони олди).

Суд буни DIS компаниясини алдаш нияти эмас, балки спорт қарори деб ҳисоблади. Ҳатто 2011 йилдаги келишув ФИФА ички қоидаларини бузган бўлса ҳам, бу жиноий жавобгарликка сабаб бўлмайди. «Бу жиноий эмас, балки спорт маъмурий ҳуқуқи соҳасига тааллуқли», дейилади қарорда.

Суднинг таъкидлашича, Неймар, унинг отаси, «Сантос» ва «Барселона» ўртасида DIS компаниясини тегишли пуллардан маҳрум қилиш мақсадида тил бириктириш ҳақида ҳеч қандай далил йўқ. Футболчининг отасига тўланган 40 миллион евродан улуш бўйича даъволар рад этилди - бу маблағлар трансфер учун эмас, балки келажак учун опцион тўлови эди. «Бизнесда коррупция жинояти ҳам, ноқонуний фирибгарлик ҳам содир этилмаган», деб хулоса қилди Олий суд.

Дастлаб, прокуратура бразилиялик учун икки йил қамоқ жазоси ва 10 миллион евро жарима талаб қилган эди, аммо 2022 йил октябрь ойида барча айбловлар олиб ташланди. 2022 йил декабрь ойида эса Испания Миллий суди ишдаги барча иштирокчиларни оқлади, энди эса Олий суд бу қарорни узил-кесил тасдиқлади.

Неймар 2013 йилдан 2017 йилгача «Барселона»да ўйнаган. У клуб сафида 186 та ўйин ўтказиб, 105 та гол урган ва 76 та голли узатмани амалга оширган. Форвард икки марта Испания чемпиони, уч марта мамлакат кубогини қўлга киритган ва бир марта Чемпионлар лигаси ва УЕФА Суперкубогини қўлга киритган.

Ҳозир футболчи Бразилиянинг «Сантос» жамоасида тўп тепмоқда.