Пиёдалар ўтиш жойларига ҳам кузатув камералари ўрнатиш таклиф этилди

Фото: KUN.UZ

“Менинг фикрим” жамоавий мурожаатлар порталида пиёдалар ўтиш жойларига кузатув камераларини ўрнатиш ҳақида петиция эълон қилинди.

“Шаҳарларимиз кўчаларида кузатув камералари ишга тушганига мана икки ярим йилдан ортиқ вақт ўтди. Бугунга келиб, кузатув камералари аниқлаётган қоидабузарликларнинг сони еттитага етган, лекин бу камераларнинг 90 фоиздан кўпроғи светофорларнинг атрофларига қўйилган”, - дейилади мурожаатда.

Билдирилишича, ҳозирда камера бўлмаган жойларда, айниқса пиёдалар ўтиш жойлари (йўл қатнов қисмининг пиёдалар кесиб ўтиши учун мўлжалланган, 5.16.1, 5.16.2 йўл белгилари ва 1.14.1 — 1.14.3 йўл чизиқлари билан ажратилган бўлаги)да қоидаларга риоя қилмайдиган ҳайдовчилар тобора кўпайиб кетмоқда.

“Юқоридагиларни инобатга олган ҳолда, пиёдалар ўтиш жойларига кузатув камераларини ўрнатишни таклиф қиламиз”, - деб ёзади петиция муаллифи.