Шавкат Мирзиёев Имомали Раҳмон билан телефон орқали мулоқот қилди

Ўзбекистон Республикаси президенти Шавкат Мирзиёев 24 июль куни Тожикистон Республикаси президенти Имомали Раҳмон билан телефон орқали мулоқот қилди. Бу ҳақда президент матбуот хизмати хабар бермоқда.

Суҳбат аввалида Тожикистон президенти давлат раҳбарини туғилган куни билан самимий муборакбод этган.

Президентнинг Ўзбекистон ва Тожикистон ўртасидаги дўстлик, яхши қўшничилик ва стратегик шериклик муносабатларини мустаҳкамлашдаги роли ва фаол саъй-ҳаракатлари алоҳида қайд этилди.

Суҳбатда давлат раҳбарлари икки томонлама ва минтақавий аҳамиятга молик долзарб масалаларни муҳокама қилдилар.

Ўзаро савдо ҳажмини ошириш ва иқтисодиётнинг турли тармоқларида кооперацияни кенгайтириш, фаол гуманитар алмашинувларни, жумладан, чегарадош ҳудудлар ўртасидаги алоқаларни давом эттириш муҳимлиги таъкидланди, дейилади хабарда.