Хитой шарқида “Лекима” тўфони оқибатида ҳалок бўлганлар сони 48 нафаргача ошди, 21 киши бедарак йўқолган деб ҳисобланмоқда.
Тўфон 9 августдан бошлаб у ёки бу йўсинда Хитойнинг 9 та провинциясини қамраб олиб, 9 млнга яқин кишига таъсир кўрсатган. Ҳукумат шошилинч равишда хавфли ҳудудлардан 1,7 млндан кўпроқ одамни эвакуация қилишига тўғри келган. Табиий офатдан шарқий провинциялар Чжэцзян, Шаньдун ва Анхой энг кўп талофат кўрган. Минглаб авиарейслар бекор қилинган ёки қолдирилган.
Хитойнинг йирик шаҳарларидан бири – Шанхай ҳам тропик циклон оқибатларини ўзида ҳис қилган. Бу ерда кучли шамол ва ёмғирлар туфайли соҳилбўйи ҳудудларидан 250 мингдан кўпроқ одам эвакуация қилинган, ер усти ва ҳаво транспорти иши бир кундан кўпроқ вақтга издан чиққан.
Айни вақтда тўфон маркази қитъани тарк этиб, Бохай кўрфазида ҳаракатланмоқда. У тобора ўз кучини йўқотиб бормоқда.
