Испанияда янги мавсум бошланмоқда. Грандлар янги юлдузлар билан

«Барселона», «Реал» ва «Атлетико» таркибларни янгилади ҳамда янги чорловларга тайёр.

Фаворитлар

Сўнгги 7йил мобайнида Испания чемпионатида совриндор бўлиб келаётган жамоалар таркиби ўзгармаяпти: «Атлетико», «Барселона» ва «Реал». Бу учлик навбати билан шоҳсупага кўтарилмоқда ва бошқа жамоалар бу учликка кириши даргумон. Сўнгги икки мавсумда «Барселона» чемпиона бўлди, икки сафар ҳам «Атлетико» иккинчи, «Реал» учинчи ўринни эгаллади. Ҳозирча бошқа жамоалар бу уч грандга рақобат кўрсатишга қодир эмас. Ўзгармас учликка зарба беришни истовчи бошқа жамоаларнинг истаги ҳам йилдан йилга кучайиб бормоқда.

Аввалги мавсумда катта фарқ билан ғолиб бўлган «Барселона» ёзги трансферлар вақтида ҳам жим турмасдан таркибини янада кучайтириб олди. Жамоа сафини юлдузли футболчилар, тажрибали Антуан Гризманн ва истиқболли Френки де Йонг тўлдирди. Шу билан биргаликда, кўк-анорранглилар бир қатор футболчилардан қутулди - «Эвертон»да ижара асосида ўйнаб келган Андре Гомеш шу жамоанинг ўзига трансфер қилинди, «Арсенал»да ўзини кўрсата олмаган Денис Суарес ўзининг биринчи жамоаси «Сельта»га қайтди, Пако Алькасер Германияда «бахтини топди» - Дортмунднинг «Боруссия»си тўпурар ҳужумчининг трансфер ҳуқуқини сотиб олишга қарор қилди. Шунингдек, Дуглас ва Вермален ҳам ўзларига янги жамоа топишди - бразилиялик эркин агент сифатида «Бешиктош» билан битим тузди, бельгиялик Иньестанинг ёнига, Япониянинг «Виссел Кобе» клубига бориб қўшилди. Сентябргача яна ўзгаришлар бўлиши мумкин - Неймар қайтарилиши ва унинг ўрнига Коутиньо ҳамда Ракитич Парижга йўл олиши эҳтимоли бор. Агар бу алмашув рўй берса, жамоанинг яримҳимоя чизиғидаги футболчиларга юклама кўпаяди, лекин ҳужум чизиғи даҳшатли кўринишга келади.

«Атлетико» эса мавсумлар оралиғида бутунлай янгиланди, дейиш мумкин. Жамоани кўп йиллик сардор Диего тарк этиб, «Интер» сафига эркин агент сифатида қўшилди, мадридликлар Гризманнсиз қолишди - у асосий рақиб сафига ўтиб кетди, Родри энди «Манчестер Сити»да, Хосеп Гвардиола қўли остида тўп суради. Лекин «матрасчилар» позицияни бериб қўймоқчи эмас. Диего Симеоне жамоаси «Реал»дан Маркос Льорентени олди ва «Бенфика»дан ёш талант Жоау Фелиш келди - португалиялик футболчи учун «Атлетико» ўзи учун рекорд даражада бўлган маблағни тўлади - 126 миллион евро.

«Реал» ўтган мавсумда икки мураббийни истеъфога чиқарди, бу Флорентино Перес бошқарувидаги энг ёмон мавсум бўлди. Жиддий трансферлардан кейин ҳам жамоа мавсумолди йиғинини кўнгилдагидек ўтказа олмади ва Зинедин Зидан таркибга яна янги футболчилар жалб этиши мумкин. Яримҳимоя учун Поль Погба, Кристиан Эриксен ва Донни ва де Бек номзодлари бор, ҳужум чизиғини эса Неймар тўлдириши ҳам мумкин. Бу футболчилар Мадридга келмаган тақдирда ҳам жамоа чемпионлик учун асосий даъвогарлар қаторида қолади: Зинедин Зиданнинг бажарилиши керак бўлган вазифалар рўйхатида «барча турнирларда ғалаба қозониш» ёзуви мавжуд.

Ўтган мавсум совриндорлари

«Барселона» катта фарқ билан чемпионатни ютганди, ўтган мавсум арафасида «Севилья»га қарши ўйинда Испания Суперкубоги қўлга киритилганди, коллекцияга Испания Кубогини қўшиб қўйиш ҳам режалаштирилганди, аммо финалда «Валенсия»нинг қўли устун келди ва бу жамоа саккизинчи марта ушбу кубокка эга чиқди.

Испания Суперкубогининг янги формати

Хорижий инвесторлар эътиборини ички чемпионатга жалб қилиш мақсадида испанлар ўз тарихида илк марта Суперкубок форматини ўзгартиришга қарор қилишди. Энди соврин август ойида эмас, мавсум ўртасида, Янги йилдан кейин (8-12 январь) ўйналади, соврин учун аввалгидек икки жамоа эмас, балки тўрт жамоа (бу сафар «Барселона», «Атлетико», «Реал» ва «Валенсия») кураш олиб боради. Испания чемпионати президенти Хавьер Тебас Суперкубок ўйинлари мамлакатдан ташқарида ўтказилиши ҳақида айтиб ўтган. Катта эҳтимол билан ўйинлар Осиёдаги мамлакатлардан бирида бўлиб ўтади.

Юқори дивизионга чиққанлар

Икки йиллик танаффусдан кейин Примерога «Осасуна» қайтган. Ягоба Аррасте шогирдлари Сегундада биринчи ўринни эгаллашди, аммо бу жамоа янги мавсум учун таркибини жиддий кучайтиришга улгурмади. Памплоналиклар икки ҳужумчи - Авилу ва Адриан Лопесни сафга қўшиб олишди, шунингдек, ўтган мавсумда жамоада ижара асосида ўйнаган футболчилар билан шартнома имзоланди. Катта эҳтимол билан «Осасуна» бу мавсумда ўзига хос бўлган ишни қилади - «лигада жон сақлаб қолиш» учун курашади.

Қуйи дивизионда иккинчи ўринни эгаллаб, юқорига кўтарилган «Гранада» бу ёзда бир қатор ёши ўтган футболчилари билан хайрлашди. Трансфер ҳуқуқи «Удинезе»га тегишли бўлиб, ўтган мавсумда ижара асосида «Осасуна»да ўйнаган Мачиснинг трансфер ҳуқуқи сотиб олинди. Лиссабоннинг «Спортинг» клубидан ҳимоячи Дуарте харид қилинди, яримҳимоя чизиғи учун «Севилья»дан Брайс ва «Леганес»дан Вико трансфер қилинди. Аммо асосий трансфер Сольдадо бўлди, у эркин агент сифатида жамоага келиб, бир йиллик шартномага имзо чекди. Бу тажрибали ҳужумчининг голлари жамоани яна бир мавсумга юқори лигада олиб қолиши мумкин.

«Мальорка» эса мавсум якунида қуйи дивизионга равона бўлишга асосий номзод. Испания юқори дивизионидаги энг камбағал жамоа бу ёзда «Реал» ёшлар жамоасидан эркин агент сифатида келган Алеиш Фебас билан битим тузди. У айни вақтда «оролликлар» жамоасининг энг қимматбаҳо футболчисидир (атиги 4 миллион евро).

Аутсайдерлар

Умуман, бу мавсум юқори лигага чиққан барча уч жамоа ҳам мавсум якунида ортга қайтиб кетиши эҳтимоли юқори. «Мальорка», «Гранада» ва «Осасуна»нинг бюджети лигада жон сақлаб қолиш учун курашишдан бошқасига имкон бермайди. Бундай учлик учун «Вальядолид» ҳам даъвогар, бу жамоа ўтган мавсумда ҳам лигани тарк этишга яқин бўлганди, аммо якунда Каталониянинг «Жирона» клубидан 4 очко кўпроқ жамғарди ва лигада қолди.

Турнир тизими

Испания одатдагидек 4 жамоаси билан Чемпионлар лигасида қатнашади. Бу мавсумда ҳам катта эҳтимол билан «Атлетико», «Барселона» ва «Реал» дастлабки уч ўринни банд этади, тўртинчи ўрин учун чемпионат иштирокчиларининг қарийб ярми кураш олиб боради. Бешинчи ва олтинчи ўринлар Европа Лигасига йўлланма беради, бу турнирда испанлар доимо яхши иштирок этишади. Нуфузи жиҳатидан иккинчи ўринда турувчи бу халқаро турнирга йўлланмани Испания Кубоги ғолиби ҳам олиши мумкин - агар бу жамоа Чемпионлар лигаси йўлланмасини кафолатлаб қўймаса. Мавсум омадсизлари - сўнгги уч ўринни эгаллаган жамоалар бўлади - улар тўғридан-тўғри қуйи лигага равона бўлишади, ҳеч қандай ўтиш ўйинлари кўзда тутилмаган.

Мавсумлар оралиғидаги асосий трансферлар

Уч гранд ва бошқа жамоалар ўртасидаги фарқ йириклашгандан йириклашмоқда. «Реал», «Атлетико» ва «Барселона» ҳужум чизиғи учун яна юлдузли футболчиларни сотиб олишди. Каталонияликлар Антуан Гризманн учун «Атлетико»га шартномада кўрсатилган бадал пулини тўлиқ тўлади, «Реал» «Челси»нинг асосий футболчиси Эден Азарни ўзиники қилди, «матрасчилар» эса «Бенфика»дан «янги Роналду» дея таърифланган 21 ёшли Жоау Фелишни Испанияга олиб келди. Бу футболчиларнинг ҳар бири учун камида 100 миллион евродан тўланди. Шунингдек, «Барселона» де Йонг билан кучайди («Аякс», 75 миллион евро), «Атлетико» Англиядан Киран Триппьерни ва қўшнилардан Маркос Льорентени сафига қўшиб олди, «Реал»да ҳам «қайта қуриш» амалга оширилди ва ёзда жамоа 5 нафар футболчини сафга қўшиб олди. Бу ёзда Испания чемпионатидаги энг йирик 10 трансфердан 5таси айнан «Реал» трансфер қилган футболчилардир - Эден Азар («Челси», 100 млн евро), Лука Йович («Айнтрахт», 60 млн), Эдер Милитао («Порту», 50 млн), Ферлан Менди («Лион», 48 млн) ва Родригу («Сантос», 45 млн). Шунингдек, «Бетис» кишибилмас тарзда «Лион»дан «арзимаган» 20 миллион евро эвазига Франция чемпионати юлдузларидан бири Набил Фекирни сафига қўшиб олди. Агар қолган вақт давомида испан жамоаларидан бири Неймарни ҳам қайтаришга эришса, мавсум янада томошабопроқ бўлади.

Юқорида айтилганидек, кучли учлик ўрнини бериб қўймайди, турнир жадвали ўртасида эса қақшатқич кураш кечади. Испания футболида ҳамма нарса бўлиши мумкин: камтаргина «Эйбар» грандларни мағлуб этиб қолиши, истиқболли саналган «Сельта» эса турнир жадвалининг қуйи қисмида лигада қолиш учун кураш олиб бориши мумкин, «Бетис» лойиҳаси ҳақида эса аллақачон халқаро майдонларда гапиришмоқда.

Испан грандларидаги «қайта қуриш» ҳали якунланмади. Зинедин Зидан «Реал»ни янгилашда давом этишни истайди, у жамоага Погба етишмаяпти деган фикрида қатъий, «Барса» эса иккита кучли таркибга эга бўлиш учун ҳаракатларини давом эттирмоқда, мавсумлар оралиғида жуда ёрқин ўйин кўрсатган «Атлетико» («Реал» яқиндагина 7:3 ҳисобида мағлуб этилди, «Ювентус» ҳам 2:1 ҳисобида мағлубиятга учратилди) бу ишларини чемпионатда ҳам давом эттиришга чоғланган.

Прогноз

Бир мавсумда мураббий алмаштириш бўйича рекордини янгилаган «Реал» бошлаган жойига қайтди. Катта трансферлар ваъдалари билан қайтарилган Зидан янги жамоа қуришга киришди. Франциялик мутахассисга карт-бланш тақдим этилди. Қаторасига уч мавсумда Чемпионлар лигасида ғолиб чиққан мураббий жамоани яна катта йўлга бошламоқда. Аммо бу мавсумда «Реал» ички чемпионатда иккинчи ўриндан юқорига кўтарилиши қийин.

Авлодлар алмашинуви сабаб кичик инқирозни бошдан кечирган «Барселона»га «янги қон» қуйилди. Эрнесто Вальверде жамоаси ўйинига ранг-баранглик етишмай қола бошлагач, клуб раҳбарияти Антуан Гризманн ва Френки де Йонгни трансфер қилишга қарор қилди. Бундай кучайтирилган таркиб билан каталонияликлар яна бир бор чемпионат ғолиби бўлишга мажбур. Бошқа натижани оқлаб бўлмайди.

«Атлетико» одатдаги каби етакчиларини сотиб юборишдан қўрқмади, кетганлар ўрнига янгилари келишди ва жамоа барқарор ўйин намойиш эта олади. Агар Диего Симеоне Чемпионлар лигасига эмас, ички чемпионатга асосий эътиборни қаратса, «матрасчилар» «Барселона» билан бош соврин учун рақобат қилади.

Тўртинчи ўрин учун асосий даъвогарлар Севильядаги жамоалардир. Бу мавсумлар оралиғида ёш футболчилар билан кучайган «Севилья»нинг ўзи бўлиши ҳам мумкин, томошабоп футбол намойиш этишни ўрганиб олган «Бетис» бўлиши ҳам мумкин. Катта бюджетга эга бўлмаган жамоалардан сюрприз кутиш ҳамиша ёқимли. Ахир пулдор клублардан фақат ғалаба кутилади, чекка ҳудуддаги камтар жамоаларнинг «бош кўтариши» эса ҳамиша футболни қизиқарли қилади.

1-тур ўйинлари

16 август. «Атлетик» — «Барселона» (00:00).

17 август. «Сельта» — «Реал» (20:00), «Валенсия» — «Реал Сосьедад» (22:00), «Мальорка» — «Эйбар» (23:00), «Вильярреал» — «Гранада» (00:00), «Леганес» — «Осасуна» (00:00).

18 август. «Алавес» — «Леванте» (20:00), «Эспаньол» — «Севилья» (22:00), «Бетис» — «Вальядолид» (00:00), «Атлетико» — «Хетафе» (01:00).

Иқтибослар

Зинедин Зидан, «Реал» бош мураббийи:

«Биз мавсумни кучли ўтказишга мажбурмиз. Жамоа мураккаб ўйинларга тайёр, биз чемпионатга жиддий кайфиятда кириб боряпмиз».

Диего Симеоне, «Атлетико» бош мураббийи:

«Биз энди Мадриднинг иккинчи жамоаси эмасмиз. Жамоанинг ўз услуби бор. Хименес, Сауль, Коке, Томас - бу футболчилар етакчиларга айланиши ва бошқаларни ўз ортидан эргаштириши керак».

Эрнесто Вальверде, «Барселона» бош мураббийи:

«Жамоага Неймар келадими? Кўрамиз. Ҳозирча мен ўз ихтиёримдаги футболчилар билан ишлайман».