Йўл ҳаракати инспекторига куч ишлатган эр-хотин жаримага тортилди

Ширакайф ҳайдовчи Б.Ж. жорий йил 23 март куни соат тунги 02:00ларда “Кобалт” русумли автомашинани маст ҳолатда Кармана-Пахтачи йўналиши бўйлаб бошқариб келаётганда “Самарқанд” ЙПХ масканида йўл ҳаракати хавфсизлиги ходимлари томонидан тўхтатилади, дея хабар бермоқда Самарқанд вилояти ҳокими расмий сайти.
 
Ҳайдовчининг автомашинадан тушиш ва ҳужжатларни тақдим қилиши сўралганда, эр-хотин инспекторнинг қонуний талабларига бўйсунмай, дастлаб инспекторнинг қўл телефонини синдиришади, кейин юзини тирнаб, уриб, ҳақорат қилиб, хизмат кийимларини йиртишгача боришади.

Б.Ж. ва С.Ж. суд мажлисида айбига тўлиқ иқрор бўлиб, қилган ишидан чин кўнгилдан пушаймонлигини билдиришди.

Суд томонидан, жиноят иши юзасидан мавжуд далиллар ва гувоҳлар кўрсатмалари ҳар тарафлама текширилди. Судланувчиларнинг айбларига тўлиқ иқрорлиги-ю, қилган қилмишларидан чин кўнгилдан пушаймонлиги инобатга олиниб, Жиноят кодексининг 219-моддаси 1-қисми билан судланувчи Б.Ж.га 2.027.300 сўм, судланувчи С.Ж.га 1.419.110 сўм миқдорида жарима тайинланди. Бу ҳақда жиноят ишлари бўйича Кармана туман суди раиси Алишер Сайдуллаев маълум қилган.