Пауло Коэльо Бразилия президентининг сўзлари учун французлардан узр сўради

Бразилиялик ёзувчи Пауло Коэльо мамлакат президенти Жаир Болсонарунинг Франция президенти Эммануэль Макронга қарата айтган сўзлари учун узр сўради.

Болсонару ўтган ҳафтада Макронни мустамлакачиликда ва Амазониядаги ўрмон ёнғинларини ўчиришда ёрдам бериш баҳонасида сиёсий мақсадларни кўзлаётганликда айблаганди.

"Француз дўстларимдан юзага келган инқироз, айтишим мумкинки, Болсонарунинг Францияга, Франция президенти ва унинг рафиқасига нисбатан жазаваси учун узр сўрайман. Мени кечиринглар, минг бор узр", - деди Коэльо Twitter саҳифасида жойлаштирган видеомурожаатида.

Макроннинг ўзи Бразилия президентининг сўзлари учун афсусда эканлигини билдирди. У "Бразилия халқини жудаям ҳурмат қилишини ва бу халқ ўзини тутиши юқори бўлган президентга муносиб" эканлигини қўшиб қўйди.