Фото: TASS/Zuma/Francisco Flores Seguel/Agenciauno
Чилининг Пукон шаҳри суди президент Себастьян Пиньерага уй қуришда йўл қўйилган қонунбузарлик учун 4,93 млн Чили песоси (6,8 минг доллар) миқдорида жарима тўлаш мажбуриятини юклади. Бу ҳақда BioBio радиостанцияси хабар қилди.
Маълум қилинишича, шаҳар маъмурияти президентни Кабургуа кўли бўйидаги уйига ишларни якуний қабул қилиш далолатномаси расмийлаштирилмагани учун судга берган.
Президент ушбу қонунбузарлик учун белгиланган максимал жаримага тортилган. Таъкидланишича, Пиньера жаримани тўлаб берган.
Шу билан бирга суд уйни бузиб ташлаш ҳақидаги арзни бундай қарорлар қабул қилиш унинг ваколатига кирмаслиги важи остида рад этган.
