«Ўзгидромет» кузатув тизимларини модернизация қилади

Ўзбекистон Республикасига WeatherRia So., Ltd. Корея консалтинг компанияси ҳамда KEITI Корея экологик индустриал ва технологик институти вакиллари билан ҳамкорликдаги фаолияти доирасида халқаро экспертлар ташриф буюрди. 

«Ўзгидромет» хабарига кўра, ташриф «Ўзбекистонда сув ресурслари таъминоти учун қор қоплами сатҳини ўлчашнинг кўп нуқтали лазерли сканерлаш усулини ишлаб чиқиш» лойиҳасини амалга ошириш доирасида ташкил қилинди.

WeatherRia So., Ltd. Корея метеорологик маъмурияти лицензиясига эга ягона компания бўлиб, Корея гидрометеорологик хизматини модернизациялаш ва такомиллаштиришда фаол иштирок этади. Компания дунёда биринчи қор қоплами сатҳини кўп нуқтали автоматик лазерли ўлчагични ишлаб чиқди. «Ўзгидромет» 2018 йилдан бери KEITI ва WeatherRia So., Ltd. билан ҳамкорликда кузатув тизимларини модернизациялаш лойиҳасини амалга ошириб келмоқда.

Кореялик мутахассисларнинг Ўзбекистонга ташрифлари доирасида Қамчиқ қор кўчки станциясига кўринувчанликни ўлчайдиган ҳамда Чорвоқ ва Сўқоқ минтақавий участкаларига қор қатламини ўлчаш учун кўп нуқтали автоматик лазерли ўлчагич ўрнатилди. «Ўзгидромет»нинг техник мутахассисларига янги ўрнатилган ускуналарда ишлаш бўйича машғулот ўтказилди. 

Шунингдек, ташриф давомида марказ ва GMITI раҳбарлари билан учрашув ташкил қилинди. Унда лойиҳани амалга ошириш режаси муҳокама қилинди.