Евросиё иқтисодий иттифоқи давлатларида ягона ҳалол стандарти киритилади

Евросиё иқтисодий иттифоқи давлатлари учун тез орада ҳалол маҳсулотлар ягона стандарти яратилади. Бунга “Ҳалол” халқаро стандартлаш ва сертификатлаш маркази раҳбари Айдар Газизов ваъда берди. 

Газизовнинг айтишича, стандарт яратилиши ҳалол маҳсулотларнинг бутун собиқ иттифоқ ҳудудида кузатиш имконини беради.

Газизовнинг эслатишича, 2012 йилда Нур-Султонда Евросиё стандартлаш ва сертификатлаш маркази “Ҳалол” ташкил этилган ва унга янги туртки бериш вақти келди. 

Марказ раҳбарининг таъкидлашича, МДҲ давлатларида “Ҳалол” маҳсулотларини ишлаб чиқариш ва экспорт қилишга катта салоҳият мавжуд. Унга озиқ-овқат маҳсулотларининг 70-80 фоизини импорт қилувчи араб давлатлари қизиқиш билдирмоқда.

Газизовнинг айтишича, ўнлаб йиллар давомида араб давлатларига парранда гўшти, қизил гўшт Бразилия, Индонезия, Австралия томонидан етказиб берилган. “Охирги вақтда харидорларда бу маҳсулотлар сифатига эътирозлар бор. Бундан ташқари, логистика узоқдир. Бизнинг ишлаб чиқарувчилар логистикани бир неча баробар қисқартириши мумкин. Маҳсулотларимиз  нарх, сифат, логистика бўйича қизиқдир”, деб қўшимча қилган Газизов.