Жанубий Осетияда Владимир Путин номидаги кўча пайдо бўлди

Жанубий Осетия ҳукумати Цхинвал шаҳрининг марказий кўчаларидан бири – Московская кўчасини Россия президенти Владимир Путин номи билан аташга қарор қилди. 

“Бундай қарор Жанубий Осетиянинг ҳар томонлама ва мунтазам қўллаб-қувватланиши, Жанубий Осетияни 2008 йил августда қутқарганлик ва ўшанда Россия раҳбарияти томонидан мамлакат мустақиллигининг тан олиниши қарорига миннатдорлик сифатида қабул қилинди”, деб айтган 7 октябрда Цхинвал мэри Алан Кочиев.

Унинг айтишича, кўчанинг қайта номланиши қарорини мэрлик ҳузуридаги тегишли комиссия қўллаб-қувватлаган. 

Путин номи билан аталган кўча шаҳар марказида жойлашган бўлиб, унда Жанубий Осетия давлат университети ҳамда Иккинчи жаҳон уруши йилларида ҳалок бўлган жангчилар хотирасига ёдгорлик жойлашган.

Маълум қилинишича, ушбу қарор республика президенти Анатолий Бибилов буйруғи билан Путиннинг туғилган кунида қабул қилинган. 

Россия президенти 7 октябрда 67 ёшини қаршилади. У туғилган кунини табиат қўйнида яқинлари ва дўстлари билан ўтказишга қарор қилди.