«Биз коррупцияга қаршимиз!» Асакадаги сайилгоҳ «адолатчилар» билан тўлди

Коррупцияга қарши курашиш нафақат ҳуқуқ-тартибот идоралари ходимларининг, айни вақтда жамоатчиликнинг ҳам асосий вазифасига айланди. Чунки жиноятчиликнинг бу тури жамиятда носоғлом муҳитнинг юзага келишига сабаб бўлади. Ўзбекистон “Адолат” СДП Андижон вилоят кенгаши ташаббуси билан “Биз коррупцияга қаршимиз!” шиори остида ўтказилган акция айни шу мақсадга қаратилди.

Андижон шаҳар кўчаларида ёшларнинг “Биз коррупцияга қаршимиз!”, “Коррупцияга йўл йўқ!” дея ҳайқиришлари юртдошларимиз эътиборини тортди. Фаол йигит-қизлар барчани Асака тумани марказидаги маданият ва истироҳат боғига бошлади. Сайилгоҳ жиноятчиликка қарши курашиш йўлида бир кучга айланган “адолатчилар” билан тўлди.

– Партиямизнинг сайловолди дастури лойиҳасида ҳуқуқий йўналишга алоҳида эътибор қаратилган, – дейди Ўзбекистон “Адолат” СДП Андижон вилоят кенгаши раиси Мадаминжон Мўминов. – Жумладан, биз порахўрликка қарши муросасиз курашамиз. Қаерда порахўрликка йўл қўйилса, ана шу жойда ривожланиш бўлмайди. Қолаверса, маънавий муҳит бузилади. Бу борада ёшлар билан алоҳида иш олиб бораётганимиз бежиз эмас. Уларни қанчалик соғлом руҳда тарбияласак, эртага бу ўз натижасини беради.

Ёш актёрларнинг театрлаштирилган чиқишларида ҳам бу иллатга берилган кишиларнинг эртаси йўқлиги, унга қарши курашиш ва жамиятимизнинг ривожи ўз ифодасини топди.

Куй-қўшиқлар йиғилганларни бирликка, ҳар қандай жиноятчиликларга қарши муросасиз курашишга чақирди.

– Баъзида олийгоҳлардаги порахўрлик хақида сўз юритилади, – дейди тадбир иштирокчиси Алишер Иминов. – Бунга ким йўл очяпти? Албатта, ўзимиз. Агар талаба ўз устида ишласа, билим олса уни ҳеч ким бошқа йўлга бошламайди. Қайтанга, ўша айрим пулга ружу қўйган устозлар ҳам талаба билан ҳисоблашишга, унинг билимини тан олишга мажбур бўлади.

Тадбир амфитеатрда ташкил этилган “Биз бир кучмиз!” шиори остидаги гала-концертга уланди.