Ал-Бағдодийнинг жасади денгизга чўктириб юборилди - ОАВ

Жасад Ироқнинг Анбар вилоятидаги Айн ал-Асад ҳарбий базасига келтирилиб, у ердан номаълум йўналишда олиб кетилган.

Бироқ CNN телеканалининг иккита ҳарбий манбага таяниб хабар беришича, жасад денгизга олиб борилиб, сувга чўктириб юборилган. “Ал-Қоида”нинг 2011 йилда йўқ қилинган етакчиси Усома бин Лодин жасади билан ҳам худди шундай йўл тутилган эди. Унинг жасади ҳам денгизга олиб чиқилиб, чўктириб юборилган.

Расмий маълумотларига кўра, бин Лодиннинг жасади АҚШнинг Carl Vinson ҳарбий кемасида Арабистон денгизига етказилиб, кафанланиб, сувга чўктириб юборилган.

АҚШ ал-Бағдодийнинг қабри радикал террорчилар томонидан сиғиниш жойига айланмаслиги учун уни чўктиришга қарор қилди. Таъкидланишича, ал-Бағдодийнинг йўқ қилиниши ва дафн этилиши фото ва видеоматериаллари махфийлаштирилган. 

Телеканалнинг маълум қилишича, 27 октябрда АҚШ президентининг хавфсизлик бўйича маслаҳатчиси Роберт О'Брайен NBC телеканалига интервьюсида ал-Бағдодийнинг жасади билан бин Лодинники каби йўл тутилишини айтган.