Мутасадди маҳкумларга пенсия тайинлаш ва тўлаш тартибини тушунтирди

2019 йилда қонун ҳужжатларига киритилган қўшимчаларга асосан 1 сентябрдан бошлаб озодликдан маҳрум этиш жазосига ҳукм қилинган, манзил-колонияларда жазони ўтаётган шахсларга ҳам давлат пенсияларининг бирини тайинлаш ва тўлаш ҳуқуқи берилди. Бу ҳақида Пенсия жамғармаси бўлим бошлиғи Шуҳрат Утаганов маълумот берди. 

«Фуқаро озодликдан маҳрум этилганида унга пенсия тўлови тўланмасди. 2019 йилнинг 28 август куни «Ўзбекистон Республикасининг айрим қонун ҳужжатларига ўзгартириш ва қўшмачалар киритиш тўғрисида»ги қонун қабул қилинди. Мана шу қонуннинг 1-моддасида фуқароларнинг давлат пенсия таъминоти тўғрисидаги қонунга ҳам тегишли ўзгартиришлар киритилди ва манзил колониясида жазо муддатини ўтаётган ва озодликдан маҳкум этишга ҳукм қилинган фуқароларга нафақат давлат пенсияларини тайинлаш, балки уларнинг тўловини ҳам давом эттириш ҳуқуқи тақдим этилди.

Буни қандай тушуниш керак? Айтайлик, эркак киши 58 ёшида бирорта жиноят содир этди. Жиноят содир этганидан кейин у суд ҳукми билан озодликдан маҳрум этилди ва жазо муддатини ўташ учун колонияга юборилди. Колонияга юборилганидан кейин 61 ёшида жазо муддатини ўтаётганида амнистия акти билан жазо муддати енгиллашиб, манзил колониясига юборилди. Биринчидан, у пенсия ёшига етган. Унинг озодликдан маҳрум этилгунига қадар 7 йилдан зиёд стажи бор. Бу фуқаронинг ижтимоий ҳуқуқи кафолатланади ва фуқаро бевосита манзил-колонияси маъмурияти орқали манзил-колонияси жойлашган ҳудуддаги пенсия жамғармаси бўлимига мурожаат этади. Бунда колония маъмурияти амалий ёрдам кўрсатади. Биз бу борада Вазирлар Маҳкамасининг қарорини яқинда ҳукуматга киритдик. Унда тартиби кўрсатилган. Бу фуқарога давлат пенсияси тайинланади ва унинг шахсий ҳисоб варақасига тўлаб борилади», дея мутасаддининг сўзларини келтирмоқда Kun.uz мухбири.

У маҳкумларда ёшга доир пенсияга ҳуқуқи мавжуд бўлса, ёшга доир пенсия, ТМЭК (туманлараро, туман (шаҳар) ва ихтисослаштирилган тиббий-меҳнат эксперт комиссиялари) томонидан ногиронлик белгиланган бўлса, ногиронлик пенсияси тайинлаш ҳуқуқи ҳам тақдим этилиши ҳақида айтиб ўтди.