Сўров: коммунал соҳада истеъмолчиларнинг ҳуқуқлари кўпроқ бузилмоқда

Монополияга қарши курашиш қўмитаси истеъмолчилар ўртасида ҳуқуқларининг бузилиши бўйича ўтказилган онлайн-сўровни якунлади ва унинг натижаларини эълон қилди.

Қўмита матбуот хизматига кўра, жами бўлиб 1005 та овоздан деярли 60 фоизи коммунал хизматларни кўрсатиш соҳаси, 14 фоизи – савдо соҳаси, 13 фоизи – қурилиш соҳаси, 8 фоизи – хизмат кўрсатиш ва сервис соҳаси ҳамда 5 фоизи – реклама соҳасида истеъмолчиларнинг ҳуқуқларини бузилганини кўрсатди.

Коммунал соҳа хизматлари бўйича берилган 956 та овоз ичида энг муаммоли мурожаатлар: табиий газни етказиб бериш – 33 фоиз, 31 фоиз овоз эса иссиқлик энергиясини етказиб беришга тўғри келган. Сўровда қатнашган истеъмолчиларнинг деярли 22 фоизи электр энергиясини етказиб бериш билан боғлиқ муаммоларга дуч келганлар. “Сувсоз” ва “Махсустранс” корхоналари томонидан кўрсатиладиган хизматлар эса бир хил кўрсаткичга эга – яъни 7 фоиздан.

Бундан ташқари, 1031 та истеъмолчи шунингдек, мобил операторлари, интернет провайдерлар ва банк-молия сектори хизматлари сифати бўйича ўз фикрларини қолдирганлар. Уларнинг ичида энг сифатсиз хизмат сифатида интернет провайдерларнинг хизматлари кўрсатилиб – улар 39 фоизни ташкил қилган, ундан кейин мобил операторлари хизматлари – 36 фоиз ва банк хизматлари – 25 фоизни ташкил этган.

Транспорт хизмати кўрсатиш тизими бўйича сўровда қатнашганларнинг (1058та) 65 фоизи томонидан шаҳар транспорти талаб даражасида эмас деган фикр билдирилган, бу кўрсаткич темир йўлларда аҳоли ташишлар бўйича – 18 фоизни ва авиация хизматлари бўйича – 17 фоизни ташкил қилган.

“Сўровни ўтказишдан кўзланган мақсад – кўрсатилаётган хизмат истеъмолчи томонидан қандай баҳоланаётганини билишдан иборат.

Ҳурматли коммунал хизматлар кўрсатиш соҳасида фаолият олиб бораётган корхона ва ташкилотлар, IT-коммуникация соҳасидаги компаниялар ва йўловчи ташувчи корхоналар, сизлардан илтимос, истеъмолчиларга кўрсатилаётган хизматларнинг сифатига эътибор қаратинг!

Ўзбекистон Республикаси Монополияга қарши курашиш қўмитаси ва унинг ҳузуридаги Истеъмолчилар ҳуқуқларини ҳимоя қилиш агентлиги ҳақ-ҳуқуқи бузилган ҳар бир истеъмолчига ёрдам беришга тайёр!” - дейилади қўмита сайтида.