АҚШ конгресси Трампнинг Эрон бўйича ваколатларини чеклашни кўриб чиқади

АҚШ конгресси вакиллар палатаси жорий ҳафтада АҚШ президенти Дональд Трампнинг Эронга нисбатан ҳарбий ҳаракатлар масаласидаги ваколатларини чеклашга қаратилган резолюция бўйича овоз беради. Бу ҳақда вакиллар палатаси спикери Нэнси Пелоси демократларга йўллаган мактубида маълум қилган.

Пелосининг мактубда таъкидлашича, АҚШ ҳарбийларининг эронлик генерал Қосим Сулаймонийнинг ўлишига олиб келган зарбаси “иғвогар ва номутаносиб бўлган”. “Бу ҳаракатлар Эрон билан муносабатлардаги кескинликнинг жиддий чуқурлашиши билан бирга ҳарбийларимиз, дипломатларимиз ва бошқа шахсларни хавф остига қўйди. Бизнинг конгресс аъзолари сифатидаги бош мажбуриятимиз АҚШ халқи хавфсизлигини таъминлашдан иборат. Шу сабабли биз маъмурият конгресс билан малаҳатлашмасдан, конгресснинг АҚШ конституцияси билан кафолатланган ҳарбий ваколатларини ҳисобга олмасдан бу ҳаракатларни амалга оширганидан хавотирдамиз”, деб ёзган Пелоси.

Конгресс Сулаймонийга зарба берилиши ҳақида огоҳлантирилмаган. The Washington Post нашрининг ёзишича, Оқ уй 3 январда ўтказилган операция ҳақида конгрессни 4 январда хабардор қилган. Таъкидланишича, Оқ уй томонидан конгрессга жўнатилган бу борадаги ҳисобот махфийлаштирилган ва эълон қилиниши-қилинмаслиги номаълум.

5 январда АҚШ президенти Дональд Трамп АҚШ америкалик фуқаролар ва объектларга ҳар қандай ҳужумга жавобан Эронга кучли зарба бериши мумкинлигидан огоҳлантирган. У Теҳронга қарши бундай қадамлар амалга оширилгудек бўлса, конгрессни бундан расман хабардор қилиш шартмаслигини таъкидлаб ўтган.