АҚШ Ироқни пулларидан маҳрум қилиш билан қўрқитмоқда - ОАВ

АҚШ Ироққа Нью-Йоркдаги Федерал захира банкида жойлашган ҳисобрақамига киришдан маҳрум қилиш билан таҳдид қилмоқда. Бу ҳисобрақамда нефть сотишдан тушган пуллар сақланади, деб хабар берди The Wall Street Journal нашри.

Нашр маълумотларига кўра, АҚШ давлат департаменти америкалик ҳарбийлар Ироқдан чиқарилиб юборилса, Бағдодни ушбу ҳисобрақамга киришдан маҳрум этишдан огоҳлантирган.

Бу ҳақидаги тегишли огоҳлантиришни Ироқ бош вазири Одил Абдулмаҳдий 8 январда олган.

Таъкидланишича, АҚШнинг бундай қадами Ироқ иқтисодиётига жиддий зиён етказиши мумкин. Ҳисобрақамда қанча пул сақланиши маълум қилинмаган.

Бу орада АҚШ ҳукумати ва банк вакиллари бу ахборотга изоҳ беришмаган.
 
АҚШ президенти Дональд Трампнинг айтишича, АҚШда Ироқнинг 35 млрд доллари сақланади. 

5 январда Ироқ парламенти мамлакатдан хорижий ҳарбийлар чиқариб юборилиши учун овоз берган. Бунга жавобан Трамп Бағдодга “мислсиз санкциялар” билан таҳдид қилган ва АҚШ Ироқда қурган авиабаза учун пул тўланмагунча, америкалик ҳарбийлар у ерни тарк этмаслигини айтган.