Москвада сартарошхона очган ўзбек: «Бошида патентга ҳам пулим йўқ эди»

Наманган вилоятининг Чуст туманидан бўлган сартарош ҳозирги касби билан пул топгунига қадар кўп қийинчиликларга дуч келганини гапириб берди.

«Ишни қарзга бошлаганман»

– Россияга биринчи марта 2009 йилда келганман. Иш яхши бўлмаган. Зўрға йўлкирага пул топиб, қайтиб кетганмиз. Кейин яна 2010 йилнинг бошида келдим. Келиб официантлик қилганман. Тил билганим учун шерикларимга ўхшаб унчалик қийналмадим. Бироз ишлаб, август ойида институтга кириш учун уйга қайтдим. Институтга ҳам кира олмадим.

Анча вақт ўтди, шароитим ҳам оғирлашди. Кейин 2017 йили қарз олиб, яна Россияга келдим. Бошида жуда қийналдим, қарзларим кўп эди. Дўконда ишладим, афсуски у ҳам ёпилиб кетди. Тошкентлик бир опамнинг ёрдамида сартарошхона очдим. Ишни қарзга бошлаганман. Дастлаб шу ерлик болаларнинг сочини текинга олардим. Кейин секин-секин ишим ривожлана бошлади.

Россияга келганимда квартира муаммосига дуч келганман. Ўзи билетни қарзга олиб келганман. Яна бу ерда квартира ва патентга ҳам пул тўлаш одамни анча қийнаб қўяди. Кўпчилик иш топишда қийналади. Лекин интернетни яхши тушунганим ва тилни билганим менга фойда бўлган. Келишимдан олдин интернетга эълон бериб, ишни аниқ қилиб келганман.

«Пул тўплаб олсам, Ўзбекистонга қайтаман»

– Москвада ишлашнинг яхши томони, бу ерда пул топиш осонроқ. Россияда қўрқмайсиз. Мисол учун, ўз бизнесингиз яхши юрмади. Ишни ёпасиз-да, интернетдан 500-600 долларлик ишни топасиз. Иш топиш осон.

Пул йиғиб олсам, Ўзбекистонга қайтаман. Ўз ишимни йўлга қўймоқчиман. Олдин ота-онамнинг болалар дўкони бўлар эди. Дўконда ишлаганман. Коллежни тугатганимдан кейин фақат ўзим ишлаганман. Дадам хорижга боришлари керак эди. Кузатишга келганимда дўконимизни солиқ ходимлари босган, кейин дўконимизни мусодара қилишган. Бир дўконни 3 киши ишлатардик. Ўша вақтлари (2012-2013 йиллар) жуда қийин эди савдо қилиш.

«Ўзбекистонда ўзгаришлар катта»

– Ҳозир Ўзбекистонда ўзгаришлар жуда катта. Бир воқеа айтиб бераман. Уйимизни қуришни бошлаганимизда кадастр ҳужжати қила олмаганмиз. Дадам ҳам, мен ҳам жуда кўп ҳаракат қилганмиз. Охири қачон уйимни бузишга келса, кейин айтаман дедим. Яқинда уйга бордим. Ягона дарчада синфдошим ишлайди. Керакли ҳужжатларни олиб бордим, ўзлари келишди. Бир ҳафтадан кейин қарор чиқди. Тўловини қилиб, маълумотномани кадастрга олиб бориб бердим. 3-4 кунда кадастр тайёр, деб телефон қилишди.

«Руслар сизга қандай муомала қилиши ўзингизга боғлиқ»

– Атрофдагиларнинг қандай муомала қилиши ҳамманинг ўзига, ўзини қандай тутишига боғлиқ. Ўзингизни ҳурмат қилсангиз, улар ҳам ҳурмат қилишади.

Ҳозир вазият анча яхшиланган. Фитнес залларга борсангиз, ўзбекларни кўриб анча қувонасиз...

Суҳбатни тўлиқ ҳолда юқоридаги видео орқали кўришингиз мумкин.