Самарқандлик фуқаронинг хонадонидан 2 ярим килога яқин «марихуана» топилди

Самарқанд шаҳри бўйича Ички ишлар органлари фаолиятини мувофиқлаштириш бошқармаси 5-сон ИИБ тезкор ходимлари томонидан олинган маълумотларга асосан, Самарқанд шаҳрининг Спитамен шоҳкўчасида яшовчи 1994 йилда туғилган Ш.А.нинг яшаш манзилида тинтув ўтказилган.

Самарқанд вилоят ИИБ ахборот хизматининг Kun.uz’га берган маълумотига кўра, тинтув мобайнида Ш.А. яшаётган уйнинг ертўласида «марихуана» гиёҳвандлик моддасини эслатувчи, қуритилган ўткир ҳидли модда 3 дона ширинлик қутисида, 3 дона целлофан пакетда, 1 дона елим қопда, 1 дона қора рангли сумкада яширинча сақлаб келинаётганлиги аниқланган. Ашёвий далиллар белгиланган тартибда ҳужжатлаштириб, текшириб кўриш учун Самарқанд вилоят ИИБ Эксперт криминалистика бўлимига юборилган.

Самарқанд вилоят ИИБ Эксперт криминалистика бўлимининг хулосасига кўра, мазкур ўткир ҳидли модда 2419,37 грамм миқдордаги «марихуана» гиёҳвандлик моддаси эканлиги маълум бўлди.

Мазкур ҳолат юзасидан фуқаро Ш.А.га нисбатан Ўзбекистон Республикаси Жиноят кодексининг 25-, 273-моддаси 5-қисми, 270-моддалари билан жиноят иши қўзғатилиб, дастлабки тергов ҳаракатлари олиб борилмоқда, — дейилади ИИБ маълумотномасида.