Тошкентда 2-халқаро авиация форуми санаси эълон қилинди

Тошкент шаҳрида Uzbekistan Airports, Aviation&Logistics Forum (UAALF-2020) халқаро авиация форуми иш бошлади. Бу ҳақда Kun.uz мухбири хабар қилмоқда.

Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов нутқ сўзлади.

Унинг сўзларига кўра, Тошкентда 2-халқаро авиация форуми 2021 йил 3-4 март кунлари бўлиб ўтади.

UAALF 2020 халқаро форумида Буюк Британия, Германия, Франция, Канада, Ҳиндистон, Бразилия, Туркия, Кувайт, Миср, Россия, Хитой, Жанубий Корея каби кўплаб давлатлардан 60дан зиёд экспонент, 300 делегат ва 1200 мутахассис, жумладан хорижий давлатларнинг транспорт вазирликлари раҳбарлари, фуқаро авиацияси ва аэропортлар бошқаруви вакиллари, етакчи халқаро ва хорижий авиакомпаниялар, аэропортлар, авиация ҳамда транспорт соҳасидаги компанияларнинг юқори лавозимли расмийлари иштирок этмоқда.

Бундан олдин, Азиз Абдуҳакимов Ўзбекистон ҳар бир чартер рейсга неча минг доллар компенсация тақдим этишини айтганди.

Шунингдек, Ўзбекистонга ҳар йили 12 миллиондан ортиқ киши ташриф буюриши борасида режалар мавжудлиги маълум қилинди.

Бундан ташқари, Азиз Абдуҳакимов Ўзбекистонга хорижий сайёҳлар оқимига хизмат кўрсатиш бўйича авиарейслар етишмаётганини билдирди.