16−18 июн кунлари Тошкент шаҳрига юк машиналари киритилмайди

Шу кунларда Тошкент халқаро инвестиция форуми ўтказилиши муносабати билан пойтахтнинг айрим кўчаларида транспорт ҳаракати ҳам вақти-вақти билан чекланади.

16−18 июн кунлари пойтахтда бешинчи Тошкент халқаро инвестиция форуми бўлиб ўтади. Форум давомида хавфсизликни таъминлаш мақсадида шаҳарнинг айрим кўчаларида транспорт воситалари ҳаракати вақти-вақти билан чекланади. Бу ҳақда ИИВ хабар берди.

Қуйидаги кўчаларда ҳаракат чекланади:

· Ислом Каримов ва Шароф Рашидов кўчалари чорраҳасидан Ислом Каримов кўчаси бўйлаб Ислом Каримов ва Фурқат кўчалари чорраҳасигача;

· Махтумқули, Темур Малик ва Янги Ўзбекистон кўчалари кесишмасидаги кўприкдан Янги Ўзбекистон кўчаси бўйлаб Янги Ўзбекистон ва Истиқлол кўчалари чорраҳасигача;

· Ислом цивилизацияси маркази атрофидаги ҳудудларда, жумладан, Шароф Рашидов ва Абдулла Қодирий кўчалари чорраҳасидан Абдулла Қодирий ҳамда Қорасарой кўчалари бўйлаб Қорасарой ва Нурафшон кўчалари чорраҳасигача.

Йўл ҳаракати иштирокчилари учун айланма йўллар ташкил этилади. Тезкор хизматларнинг махсус автотранспорт воситалари ҳаракати бундан мустасно.

Шунингдек, тадбир кунлари Тошкент шаҳрига юк машиналари кириши ҳам чекланади. Уларнинг ҳаракати Тошкент вилоятидаги айланма йўллар орқали ташкил этилади.