Time нашри 100 йилликнинг 100 аёлини танлади

АҚШнинг Time журнали 1920 йилдан бошлаб тарих ривожига аҳамиятли ҳисса қўшган 100 аёлни ўз муқовасига жойлаштирди.

Таъкидланишича, нашр 72 йил давомида фақат йил эркагини эълон қилиб келган. Баъзи истиснолардан ташқари бу ном эгалари ҳамиша эркаклар бўлган.

1999 йилда “Йил эркаги” номинацияси “Йил одами”га ўзгартирилган, бироқ шундан кейин ҳам нашр ушбу йўналишда кўпроқ эркакларни танлаб келган.

“Йилнинг 100 аёли” лойиҳаси билан кўпинча сояда қолган нуфузли аёлларга эътибор қаратмоқчимиз”, дейилган хабарда.

From Amelia Earhart to Beyoncé and Eva Perón to Malala, meet 100 women who defined the last century https://t.co/ycfvgsoTWZ

— TIME (@TIME) March 5, 2020

Дастлаб мутахассислар 600 номзодни таклиф қилишган, улардан ҳар бир йил учун бир нафардан, жами 100 нафар аёл танлаб олинган.

Сўнгра рассомлар 1920 йилдан бошлаб журнал сонлари муқовасини яратишган. Журнал шу тариқа 89 та янги муқова ҳамда нашр талқинига кўра йил одами бўлган яна 11 аёл тасвирланган муқоваларни яратган.   

“Амелия Эрхартдан [Атлантика океанини учиб ўтган илк аёл учувчи] Бейонсегача [америкалик қўшиқчи], Эва Перондан [Аргентинанинг собиқ биринчи хоними] тортиб Малала Юсуфзойгача [тинчлик учун Нобель совриндори] – юз йилликнинг қиёфасини шакллантирган 100 аёлни қаршиланг”, деб айтилган журналда. 

Шунингдек, нуфузли аёллар юзталигига турли йиллар учун франциялик модельер Коко Шанель, актриса Мэрилин Монро, мексикалик рассом Фрида Кало, АҚШнинг собиқ биринчи хонимлари Элеонора Рузвельт ва Жаклин Кеннеди, америкалик ҳуқуқ ҳимоячиси Анжела Дэвис, Ҳиндистоннинг ягона аёл бош вазири Индира Ганди, ОИВнинг очилишида иштирок этган франциялик вирусолог Франсуаза Барре-Синусси, малика Диана, қўшиқчи Мадонна, Британия қироличаси Елизавета II, Германия канцлери Ангела Меркель, эко-фаол Грета Тунберг киритилган.