Ўзбекистонда кинотеатрлар вақтинча ёпилади

Ўзбекистонда ҳудудида коронавирус тарқалишининг олдини олиш мақсадида мамлакатдаги барча кинотеатрлар фаолияти вақтинча тўхтатиб турилади. «Ўзбеккино» Миллий агентлиги фуқароларга фильмлар томоша қилишнинг муқобил йўлларини таклиф қилди.

Алишер Навоий номидаги кино саройи / Фото: kinopanorama.uz

Ўзбекистон ҳукумати томонидан COVID-19 касаллигининг олдини олиш бўйича белгиланган чора-тадбирларга кўра, «Ўзбеккино» Миллий агентлиги мамлакатдаги барча кинотеатрларнинг фаолиятини тўхтатади.

Миллий агентлик давлат ва нодавлат телеканаллари орқали кинотеатрларда намойиш этиладиган ҳужжатли, бадиий ва анимацион фильмларни теледастурлар эфир жадвалига киритиш лойиҳасини ишлаб чиқмоқда.

Лойиҳага кўра, «Ўзбеккино» томонидан давлат ва нодавлат телеканалларига телевизион намойиш қилиш учун бадиий, ҳужжатли, мультиплакацион фильмлар ва бошқа кино маҳсулотларини беғараз асосда етказиб бериш учун махсус пакети шакллантирилган.

Эслатиб ўтамиз, 15 март куни Ўзбекистонда коронавируснинг илк ҳолати қайд этилди – 11 мартда Париждан учиб келган шифокор аёлнинг қонида вирус аниқланди. У билан контактда бўлган 150га яқин киши изоляция қилинган.