Карантин даврида бир қатор ижро ҳаракатлари кейинга қолдирилади - МИБ

Республикадаги мавжуд эпидемиологик ҳолат — карантин даврида Мажбурий ижро бюроси томонидан қайси ижро ҳаракатлари вақтинча амалга оширилмаслиги маълум қилинди

Шавкат Ҳайдаров / Фото: KUN.UZ

Мажбурий ижро бюроси директори ўринбосари Шавкат Ҳайдаровга кўра, карантин даврида бир қатор ижро ҳаракатлари кейинга қолдирилади. У бу ҳақида онлайн брифингда тўхталиб ўтди, дея хабар бермоқда Kun.uz мухбири.

“Бугунги карантин даврида давлат ижрочиларига қуйидаги мажбурий ижро этиш чораларини қўлланишини ҳамда фаолият йўналишлари бўйича ижро ҳаракатлари амалга оширилишини кейинги қолдириш тавсия этилмоқда:

- ундирувни турар жойлардаги (яшаш хонадонидаги) мол-мулкига қаратиш, шу мақсадда уларни хатлаш ва олиб қўйиш;
- ижро ҳужжатида кўрсатилган муайян ашёларни қарздор жисмоний шахсдан олиб қўйиш ва ундирувчига топшириш;
- қарздорни кўчириб чиқариш;
- ундирувчини кўчириб киритиш;
- ер участкасини олиб қўйиш ва ўтказиш;
- иморат (қурилма)ни бузиб ташлаш;
- болани олиб бериш ва топшириш”, деди Шавкат Ҳайдаров.

Маълум қилинишича, давлат ижрочиларига юқоридаги ижро ҳаракатларини фақат кечиктириб бўлмайдиган ҳоллардагина карантин қоидаларига қатъий риоя қилиб, ҳудудий бошқарма бошлиғи ёки унинг ўринбосари рухсати билан амалга оширилиши мумкинлиги тушунтирилмоқда.